Lafaek News—Ministru Edukasaun Juventude no Desportu (MEJD), Armindo Maia, hatete rekrutamentu professór hamutuk 975 sei iha prosesu diskusaun nia laran.
“Iha mós kestaun kona-ba rekrutamentu ba 975 vaga ne’ebé sira kontratadu ne’e mós ha’u informa ita sei iha prosesu diskuzaun, ba sira kontratadu 5.000 itál depois sira voluntáriu 2.000 itál, vaga 970 ne’ebé ita iha ne’e sei iha prosesu diskuzaun”, dehan Armindo Maia hafoin enkontru ho Primeiru Ministru, Taur Matan Ruak, iha rezidénsia Faról Dili, sesta semana.
Governante ne’e akresenta, iha prosesu rekrutamentu ne’e envolve mós profesór voluntáriu no kontratadu sira ne’ebé mak oras ne’e seidauk simu vensimentu husi Ministériu Edukasaun.
“Primeiru kontratadu ne’ebé selu husi saláriu vensimentu husi Ministériu ninian ne’e serka de 5.200 itál ne’e kontratadus selu saláriu vensimentu maibé iha mós voluntáriu rihun-ida-resin ne’ebé eskola hatama eskola mak selu maibé eskola mak selu inan aman karik mak selu entaun ba vaga ida 950 ne’e 2021 nian ne’e talvéz voluntáriu sira ne’e halo rekrutamentu,” dehan nia.
Ne’e duni ida ne’e seidauk iha desizaun fixa liga rekrutamentu professores sira, tanba Ministériu Edukasaun Juventude no Desportu sei halo hela diskusaun hafoin mak informa fila fali ba públiku.
Jornalista : Juvita dos Santos
Editor : Agapito de Deus
