Lafaek News—Ministériu Saúde (MS), deteta tan kazu pozitivu Covid-19 foun na’in 8, entre numeru ne’e na’in 6 máka iha Dili, na’in 1 husi Baukau no 1 seluk husi RAEOA, atual baixa 107 la hatudu sintomas.
“Kazu na’in 8 ohin, iha mane na’in 4, feto na’in 4, Idade 15 ema na’in 1, Idade entre 21-30 nian 7, hotu-hotu asintomátiku ka la hatudu sintomas, no entradas irregulares husi fronteira terrestre husi 1 de Marsu to’o ohin meiu-dia hamutuk ema na’in 27,”dehan koordenadór forsa tarefas ba prevensaun no mitigasaun surtu Covid-19, Rui Maria de Araújo, ba jornalista sira liu husi Meetin Zoom, Kuarta (17/03/2021).
Nia dehan, husi kazu foun iha leten, na’in 6 iha Munisípiu Dili, iha ne’ebé kazu pozitivu na’in 3 husi Aldeia 05, Suku Fatuhada, Postu Administrativu Dom Aleixo, pozitivu hirak ne’e kontaktu besik (hela uma-laran ida), ho kazu konfirmadu husi cluster hanesan, ne’ebé anunsía horiseik.
Kazu pozitivu 1 husi Aldeia São Miguel, Suku komoro, Postu Administrativu Dom Aleixo, Pozitivu hirak ne’e kontaktu-besik ho kazu pozitivu iha cluster Aldeia 05, Suku Fatuhada, Kazu ida ne’e profisionál saúde ida iha HNGV, unidade hemodiálize, nia servisu hamutuk ho profisionál saúde ne’ebé horiseik anunsía katak pozitivu.
Nia hatutan, Kazu pozitivu 2 máka husi Aldeia Avansa, Suku Bairro Pite, Postu Administrativu Dom Aleixo, Pozitivu rua ne’e kontaktu- besik ho kazu pozitivu iha cluster hanesan, ne’ebé anunsía horiseik.
Nune’e mos relata, kazu detetadu ka pozitivu iha Munisípiu Dili husi dia 7 de Marsu to’o ohin hamutuk hotu 83 no Kazu detetadu 83 iha Dili ne’e, fahe ba cluster 23, namkari iha instituisaun 3, eventu 1 no Suku 7, no fatin kuarentena 1, iha Postu Administrativu Don Aleixo, no mós Postu Administrativu Vera- Kruz.
“Ohin, Munisípiu Baukau iha kazu foun 1, kazu konfirmadu foun 1 ne’e, ba husi Dili iha dia 8 de Marsu, nia estudante UNTL, iha Dili hela iha Aldeia Moris Foun, Suku Komoro, Postu Administrativu Don Aleixo,” dehan nia.
Koordendór hetete, total kazu husi Baukau iha kazu konfirmadu hamutuk na’in 7, ne’ebé namkari iha cluster 2, ekipa konjunta saúde buka-tuir ona kontaktu-besik iha Munisípiu Baukau ho Dili.
Alende ne’e mós, ohin autoridade RAEOA informa katak deteta kazu konfirmadu 1, ema estranjeiru ne’ebé tama ho vistu servisu, auto-kuarentena durante besik semana 2, hafoin halo teste hetan rezultadu pozitivu.
“Sira ne’ebé halo kuarentena hamutuk sei estende tan kuarentena ba loron 14, no 1 ne’ebé pozitivu transfere ona ba izolamentu, hamutuk hotu kazu detetadu iha RAEOA na’in 5 ona, sira husi hahú pandemia iha 2020 to’o agora,” tenik nia
Enkuantu dadus jeral Covid-19 ba loron ohin 17/03/2021, kazu foun na’in 8, rekuperadu na’in 5, no kazu ativu sa’e ba 107.
Tanba ne’e, apela ba populasaun iha Dili no Timor-Leste tomak, atu lalika halo lai viajen ba RAEOA, hodi nune’e fó tempu ba autoridade sira foti medidas nesesáriu atu prevene no la bele iha transmisaun lokál iha RAEOA.
Jornalista : Sandi Belo
Asisten Editór : Pedro de Almeida
