Lafaek News—Iha dokumentu legal ne’ebé kontratu entre kompañia Linivon ho Ministériu Saúde (MS) liu husi Xefe Departamentu Nutrisaun (DN), Olinda Dos Reis Albino, asina iha loron 4 fulan Agusto 2020 hodi autoriza restaurante Linivon Unipesoal Lda, fornese hahán ba sala izolamentu vera-Kruz.

Iha kontratu ne’ebé Lafaek News asesu iha karta mensiona katak sita orden servisu ho númeru Ref.MS-DN/Ordem servisu/VIII/2020//227, hato’o ba restaurante Linivon Unipesoal Lda, asuntu ordem servisu ba kompañia fornese hahán ba fatin izolamentu atu asegura fornesementu hahán iha fatin izolamentu, Ministériu Saúde liu husi Diresaun Nasionál Saúde Publika Departamentu Nutrisaun, hakarak fó orden servisu fornese hahán ba ema sira ne’ebé husi fatin afetadu kona-ba surtu pandemia covid-19 iha Timor Leste.

Bainhira jornalista Lafaek News konfirma ho xefe ba Departamentu Nutrisaun Ministériu Saúde, Olinda Dos Reis Albino, afirma katak nia parte la asina ajudikasaun direta ho kompañia Linivon Unipesoal Lda ne’ebé fornese hahán ba sala izolamentu Vera-Kruz.

“Dehan hanesan ne’e, más evidénsia la’os ha’u mak asina ida, bele hanesan ne’e bele konfirma aprovazionamentu ho finansas Ministériu Saúde, tanba ha’u nia servisu da-daun la’os ko’alia kona-ba pagamentu, ha’u servisu iha nutrisaun,” dehan Xefe Departamentu Nutrisaun, Olinda Dos Reis Albino ba lafaek News via telefone, kuarta (17/03/21).

http://governu-seidauk-selu-fonesedor-hahan-ba-sala-izolamentu-vera-kruz/

Iha parte seluk, Lafaek News mós tenta konfirma (manda mensajen liu husi Whatsapp) ho Xefe Aprovazionamentu Ministériu Saúde liga ho ezijénsia kompañia fornesedór hahán Linivon Unipesoal Lda, maibé la resposta.

Jornalista      : Acacio Pinto

Editora           : Nelya Barros