Diretora Kompania Linivon, Evonia da Silva Chung hatudu kontratu ne’ebe kompania halo ho Ministerio Saude: Foto Lafaek News
Lafaek News—Jestora restaurante Linivon, Evonia da Silva Chung, ezije oitavu governu konstitusionál liu husi Ministériu Saúde atu selu ona osan hamutuk $ 7.298.00, atu nune’e bele selu staff sira inklui selu taxa ba estadu komesa husi loron 25 agusto too loron 10 Setembru 2020.
Jestora ne’e dehan, governu foin selu loron ida ka rua ho osan hamutuk $490, total deve ne’’e hahu 25 agusto too iha 10 Setembru 2020, total $ 7.298.00, kompostu husi loron hamutuk loron 18.
“Ami kompañia hapara fornese hahan ba sira tanba sira la selu, husu Ministériu Saude tenke selu ona atu ami bele selu fali ami nia staaf no selu mos pajak, atu nune’e ami labele ezije bebeik, tanba durante ami nunka ezije,” Evonia da Silva Chung, ba jornalista sira iha nia rezidénsia Bidau Akadiru-Hun aldeia Nuu-Badak Bidau, kuarta (17/03/21),
“Ami hatama tiha ona invoce no dokumentu komesa fulan 25 Agustu too dia 10 Setembru, uluk nana’in ami laiha kontratu, maibé doutora Olinda dos Reis mak mai hameno hahán atu fornese ba pasiente sira iha Verra-Kruz, semana primeiru sira seluk kedan, tuir semana tuir fali mai sira la selu ona too ohin loron,” nia sublina.
Chung dehan, relasiona deklarasaun Ministra Saúde iha media online Dili Post, governu halo kontratu ho de’it kompañia sira ne’ebé iha osan barak, maibé restaurante Linivon primeiru mana Olinda mai haruka tein de’it liu liu husi kontratu forma ruma, ho razaun katak kompañia balu ne’ebé hanesan fornese hahan laiha kualidade.
“Ami haree husi publikasaun DIli Post, MS fo kontrattu ba kompañia ne’ebé osan barak, maibé see governu la selu ami, oinsá mak ami bele kontinua fornese hahán no selu ami nia staff sira, maibé see governu mak halo hanesan ne’e oinsá ma kami setór privadu bele moris,” dehan Chung ho halerik.
Na’in ba restaurante Linivon ne’e reafirma, governu la selu durante fulan 6 hahu husi 2020, selu husi loron dahuluk de’it too agora seidauk selu, tanba traballadór hamutuk na’in haat (4).
“Sira selu ami primeiru de’it, loron dahuluk sira mai selu cas, maibé liu ona semana ida ka rua sira komesa la selu ona, entaun ami mós prepara ona fornese hahán, ami hatama ona invoice, ami mós husu dokkmentu diliber order atu asina husi pesoal saúde, hatama iha ministeriu saude,” dehan nia.
Dokumentu husi restaurante refere submete ona ba Ministériu Saúde iha departamentu nutrisaun nian, maibé see governu seidauk bele selu deve osan hamutuk 7.298.00, ami sei labele fornese tan hahan ba izolamentu verra-Kruz.
“Ami hatama iha diresaun departamentu nutrisaun, see la selu ami sei hapara fornese hahan provizóriu, tanba deve total $ 7.298.00, seidauk selu no ami hetan ajudikasaun direta, la liu husi tenderizasaun, sira mai hateten katak kompañia sira seluk fornese hahán laiha kualidade, tanba ne’e imi mak tenke tein fali atu iha kualidade,” nia hakotu.
Iha fatin hanesan, traballadór Oldegar Fátima Ismaile, relata durante ne’e nia rasik mak lori hahán ba ihia sentru izolamentu Verra-Kruz, sente trauma tanba laiha ekipamentu protesaun ruma husi governu.
“Bainhira ha’u lori hahán ba sentru izolamentu ba Verra-Kruz, too iha ne’ebá ha’u apita karreta mak sira sai mai foti, tanba ha’u labele tama too laran, sira mai foti hahan asina tiha invoce foto tiha sira ha’u mós fila ona,” Oldegar hakotu.
Jornalista : Acacio Pinto
Editora : Nelya Barros
