Lafaek News – Domingos Carvalho ho idade 40 resin, deside hela provizóriu ho nia familia iha fomentu atu halibur obralan iha fatin lixu sira iha Dili laran, hodi kontinua fa’an iha área remotas.
Domingos Carvalho informa, atividade ne’e nia hala’o iha inisiu tinan 2022 no antes ne’e Domingos nu’udar traballadór pineira rai henek iha mota Komoro, maibé dadaun ne’e nia la kontinua pineira ona rai henek tanba rai henek la folin. Ne’e duni nia foti dalan seluk kontinua hili roupa obralan ne’ebé negosiante obralan so’e iha fatin lixu, hodi ba fa’an fila fali ba iha área remotas sira.
“Uluk ha’u pineira rai henek iha mota laran maibé ema la hola tanba ne’e hau deside halibur ropa obralan ba fa’an fali iha foho hodi hetan osan uituan sustenta familia” dehan Domingos Carvalho ba Lafaek News iha merkadu Manleuana Dili, Tersa (18/01/2022).
Nia espresa, atu husu de’it obralan iha ema ne’ebé fa’an nanis ona, maibé nia sente mo’e entaun hein de’it ema so’e roupa obralan iha fatin lixu mak nia foin halibur hodi kontinua fa’an iha área remotas.
“Ha’u halibur obralan ne’e tanba roupa sei di’ak hotu, entaun ami halibur halo barak depois ba fa’an fali iha munisipiu ho folin $.0,25 no $. 0,50, maibé ida ne’e ha’u foin atu halo” Domingos espresa.
Nia relata, bainhira bada’en sira bolu atu ta’a masa mak nia foin halo hodi hetan osan oituan sustenta familia, se laiha ema ida mak bolu entaun nia iha de’it uma tanba ne’e nia deside halibur roupa obralan.
Domingos Carvalho husik hela nia kaben no nia oan na’in tolu ne’ebé sei ki’ik iha Likisa Bazartete tanba atu buka osan hodi sustenta familia.
Iha sorin seluk, negosiente obralan Manleuana Adão Tilman esplika, kada semana ida sira sempre loke obralan foun iha saku ne’ebé sira sosa iha armajen,neduni roupa ne’ebé sira sente nia kores tuan ona sira so’e ba fatin lixu no ema barak mak kontinua foti hodi fa’an fila fali.
“Loos duni ami so’e roupa tanba tuan ona nomós noda barak inklui roupa sira ku’ak ne’e mak ami so’e tanba kompradór iha ne’e la sosa ona bainhira haree ropa noda ka ku’ak sira, maibé ami haree ema balu foti depois ba fa’an fali iha foho ,”informa Adão.
Adão haktuir, durante ne’e nia halo parseiru di’ak ho sira ne’ebé hili roupa iha fatin lixu, maibé to’o agora parseiru ne’e rasik la mosu.
“Iha ne’e ha’u fa’an kleur ona tanba dezde 2014 to’o agora sei fa’an nafatin obralan, durante ne’e ha’u hein ema ruma atu mai halo parseiru ho ha’u tanba ha’u nia parseiru uluk la mai ona entaun hein fali sira seluk karik mai, ha’u simu nafatin,” nia relata.
Adão fa’an roupa obralan hahú iha tinan 2014 to’o ohin loron hodi sustenta familia nomós selu rasik nia eskola to’o remata iha eskola Sekundáriu Geral FINANTIL.
Jornalista : Orlando Magno
Asisten Editora : Juvita dos Santos
