Lafaek News–Deputadu Bankada Frente Revolusionáriu Timor-Leste no Independente (FRETILIN) Helena Martins Belo informa, Ministra Saúde halo komunikasaun iha fatin hotu hodi kombate moras denge ne’ebé sa’e maka’as iha Óspital Nasional Guido Valadares, maibé to’o agora iha parte balun ekipa seidauk rega susuk.
“Ba iha Ministra Saúde liu-liu ba iha parte denge ne’ebé agora dadauk aas iha Dili, los duni komunikasaun la’o iha fatin-fatin maibé to’o agora parte balun seidauk rega, entaun buka atu nune’e tau iha atensaun másimu ba iha komunikasaun atu bele kombate no prevene denge ne’e,” dehan Deputada FRETILIN Helena Belo iha nia Plenaria iha Parlamentu Nasional, segunda (17/01/2022).
Iha fatin hanesan, Deputadu Bankada Partidu Libertasaun Povu (PLP), Rosalina Ximenes hateten, moras denge ne’ebé akontese ba labarik ki’ik sira iha Óspital Nasional Guido Valadares (HNGV) komesa aumenta no seidauk rekopera hotu.
“Ha’u ba Óspital Nasional Guido Valadares, moras denge ba labarik sira barak tebes balun rekopera ona balun sei aumenta nafatin, ho ida ne’e sira-nia familia no inan aman katak, Ministra halo ona rega susuk ba eskola sira iha nebá, tanba sira lahatene sira-nia oan maka moras maibé ekipa ida rega susuk ne’e, sira laharee atu rega sira nia fatin no sira nia uma no eskola sira ne’e,” Nia Informa.
Nia husu Ministra Saúde atu orienta ekipa saúde hotu ne’ebé toma konta ba rega susuk iha eskola no komunidade nia uma atu nune’e bele prevene lalais moras denge.
Entretantu, Ministru Asuntus Parlamentares no Komunikasaun Sosial (MAPKOMS), Francisco Jeronimo Martins akresenta, dadaun ne’e ekipa saúde hala’o hela atividade rega susuk ba komunidade sira nia nia uma hodi halo prevensaun ba moras denge ne’ebé dadaun ne’e sa’e maka’as iha Óspital Nasional Guido Valadares (HNGV).
“Iha ne’e atu fó tan klarifikasaun kona-ba denge ha’u hanoin prevensaun halo maka’as hela i foin halo rega susuk iha Dili laran, ha’u hanoin iha kinta feira ne’e halo iha Ai-mutin iha ar sira ne’ebé detekta katak denge sa’e maka’as i sira rega iha komunidade hotu-hotu,” hakotu, MAPKOMS Jeronimo Martins.
Jornalista : Joni Mau Risa.
Asisten Editora : Juvita dos Santos
