Lafaek News—Ministru Defeza (MD) Filomeno Paixão de Jesus, informa, rekrutamentu ba FALINTIL Forsa Defeza Timor-leste (F-FDTL), teste la’o ho di’ak no to’o ona faze apuramentu ba kandidatus 2400 atu hetan kandidatus 600, ba farda no arma governu sei rezolve.
“Dadaun ne’e fokus liu ba rekruatamemtu membru F-FDTL nian to’o ona faze apurasaun 2400 kandidatus no agora ita halo hela teste psikoformátiku no psikolójiku atu hetan kandidatus 600 husi 2400 kandidatus ne’e,” dehan MD Filomeno Paixão de Jesus, ba Jornalista sira hafoin enkontru semanal ho PR Francisco Guterres “Lú-olo” iha palasio presidensial Nicolau Lobato, tersa (22/06/2021).
Governante relata, teknikamente iha dadus rekrutamentu ne’e rihun 10 resin, maibé kandidatus rihun 2400 maka prienxe kriteira, nune’e teste sei halo fali apuramentu ba iha kandidatus 600, no iha teste nia laran buat hotu la’o ho di’ak tantu iha rekursus umanus, logistiku.
“Hotu-hotu la’o di’ak ita espara katak dentru de fulan ida ne’e ita bele remata prosesu apuramentu ba iha kandidatus 600,” tenik nia.
Ministru Defeza dehan, ekipamentus farda no armas ba kandidatus FDTL foun ne’e sei rezolve tanba agora da-daun iha hela prosesu final, no nia prosesu sei remata iha fulan Agusto, governu mós garante katak sei rezolve problema ne’e.
Enkuantu liu husi enkontru seminal Ministériu Defesa Filomeno Paixão de Jesus ho Presidente Republika (PR) Francisco Guterres Lú Olo” iha palasiu presidensial, aborda mós kona-ba relatóriu mensal desenvolvimentu Ministériu Defesa Timor-Leste nian.
Jornalista : Rita Moniz
Asisten Editór : Pedro de Almeida
