Lafaek News—Ministériu Edukasaun Juventude no Desportu (MEJD), Armindo Maia, iha hanoin atu reativa eskola husi ensinu primaria too nivel sekundárria, importante profesores ho estudante hotu liu-liu ho idade 18 ba leten obrigatoriamente tenki simu vasina.
“Hakarak apela ba Mestri no Funsionariu sira no alin estudante sira ne’ebé tinan (18) ba leten ona hotu-hotu ba tuir Vasina, inklui mós Inan-aman sira atu nune’e ita bele loke fila fali eskola sira,” dehan Armindo Maia ba Jornalista sira hafoin simu vasina iha CCD, tersa, (22/06/2021).
Governante esplika, eskola sira durante taka tanba Covid-19, se ema hotu kontribui atu tuir vasina MEJD esforsu nafatin buka kondisoens atu reativa fila fali eskola.
“Sirkular sai tiha ona, husi MEJD katak funsionariu no Profesores sira obrigatoriu no ita mós sei ba observa eskola sira ne’ebé pursentu professores sira nian ne’ebé máka vasina barak ona, entaun ita sei reativa, ne’e kondisaun ida,” Subliña Nia
Ministru dehan, eskola sira ne’ebé nia profesores no estudante sedauk simu vasina, MEJD sei foti medidas, no kondisaun ida maka tenke tuir hotu vasina.
“Ami horseik hala’o reuniaun ida, sei halo preparasaun lai, ita espera katak meadu fulan Jullu eskola sira ne’e iha kondisaun bele loke, ne’e la’os ba hotu-hotu la’e ita sei hare’e ida-idak sira ne’ebé iha kondisaun bele loke ona,” Nia Hakotu.
Jornalista : João da Costa Soares
Asisten Editór : Pedro de Almeida
