Bobonaru-(Lafaek News)—Komandante PNTL munisípiu Bobonaru Superintendente Xefe Polísia, Octavio de Araujo “Bukar” afirma, enkuantu jornalista promove munisípiu Bobonaru liu husi publikasaun iha media nasionál hotu PNTL Bobonaru prontu seguransa ba jornalista sira.
“Ami prontu halo seguransa ba jornalista bainhira sira buka informasaun iha komunidade nia let hodi publika informasaun konaba komunidade nia prekupasaun ne’ebé komunidade infrenta,” dehan Superintendente Xefe polisia Octavio liu husi nia diskursu iha salaun treinamentu PNTL Maliana Bobonaru, Segunda 09/11/2020
Superintendente Xefe Octavio informa, bainhira jornalista sira iha atividade importante ne’ebé halo dala ruma PNTL Bobonaru haluha relata ba jornalista atu halo kobertura, tanba iha tempu ne’ebé ho situasaun emerjénsia.
“Prekupasaun iha Bobonaru ne’e barak maibé sira husi munisípiu seluk no husi nasional la bele hatene kle’an tanba dala ruma ami haluha atu hato’o ba jornalista sira atu publika ami nia informasaun ba publiku konaba problema ne’ebé ami iha, funsaun Jornalista nian importante tebes tan ne’e, disponiviliza fatin ne’e sira atu halo treinamentu tanba jornalista nia servisu sei relasiona ho PNTL nia servisu tanba jornalista nee esensial liu,” katak Octavio.
Komandante PNTL munisípiu Bobonaru ne’e husu jornalista sira atu hala’o papél jornalista nian ho professional, imparsialidade no independente no livremente atu asesu iha fatin hotu hotu.
“Husu ba alin sira bainhira sai ona jornalista tenke serbisu ho didi’ak no hatudu ita boot sira nia profisionalismu tanba ema ne’ebé sai jornalista sempre independente no nia asesu iha fatin ne’ebé de’it no iha situasaun saida deit,” komandante nee esplika.
Komandante ne’e apresia tebes ba programa Konsellu Imprensa (KI) ho UNDP, tanba organiza jornalista media online hanesan Lafaek News, Naunil Media, Lalatak.com, Neon Metin, SMI sira ne’ebé mai halo formasaun iha komandu munisípiu Bonanaru.
Jornalista : Orlando Magno
Editora : Nelya Barros
