Uatu-Lari-(Lafaek News)—Eis Falintil Manuel Pinto alias Mau Iku, espresa sentimentu triste tanba kilat musan ne’ebé sei iha nia isin to’o agora seidauk hasai halo nia labele la’o no halo atividade normal.
Eis eskoltu MBKXG Manuel Pinto “Mau Iku” entrevista hela ho jornalista LN iha nia rezidensia Babulu postu Uatu-Lari (09/11/2020). Foto LN
Mau Iku konta kronolójia katak iha 1987 nia ho nia maluk sira hetan asaltu husi Forsa Indonésia iha area Maukana munisipiu Vikeke. Iha asaltu ne’e Mau Iku hetan tiru husi inimigu iha nia parte kabun, hafoin ida ne’e nia halai inimigu tiru kona tan nia kelen, maibé nia konsege halai hodi salva nia an husi situasaun krusial iha altura ne’eba.
Eis Eskoltu Komandante em Xefe das Falintil atual eis Prezidente Repúblika Kay Rala Xanana Gusmão, hateten tan, hafoin nia hetan tiru nia halai buka fatin seguru hodi halo kurtivu ba ninia kanek ho ai moruk tradisonál.
Kilat musan ne’ebé iha Mau Iku nia isin parte kelen sei tomak hela maibé kilat musan ne’ebé mak iha nia parte kabun nia konsege hasai rasik rohan no hela de’it rohan mak sei iha, ho ida ne’e halo Mau Iku nia kidan sai toos tiha hodi nia hakdasak de’it iha rai.
“Tiru pertama iha ne’e lamas tun haree ran iha, ha’u halai mak tau fali iha ne’e, Kabun ne’e hasai tiha ona sorin, maibé ida sorin ne’e la hatene lo loos ne’e rai-X mak bele hatene,” hateten Mau Iku iha nia hela fatin Babulu, Postu administrativu Uatu-Lari munisipiu Vikeke, Segunda (09/11)
Eis Falintil ne’e dehan, maske Timor Leste ukun an tinan 20 ona, maibé nia (Manuel Pinto ” Mau Iku”) seidauk hetan atensaun no tratamentu espesial husi governu relasiona ho kilat musan ne’ebé sei iha nia isin hodi kontinua fo ameasa ba ninia vida, tan ne’e nia husu ba estadu atu bele fò protesaun ba nia hodi nia bele hetan tratamentu ba ninia moras ne’e.
“Kilat musan mós seidauk hasai halo ha’u dolar de’it iha rai imi hanoin ba, Nai ulun sira se imi hanoin entaun hasai tanba hali ha’u isin toos hotu kidan toos hotu,” Mau Iku espresa ho lian halerik.
Kontribuitór : Azonto Viana
Editora : Nelya Barros
