Bobonaro (Lafaek News)—Situasaun ekonomia afeta povu kiik sira nia moris iha remotas krítiku afeta ba direitu labarik sira susar atu asesu ba iha edukasaun.
Avo Venancio ho nia familia foto hamutuk iha sira nia uma Atubaen. foto LN Juvita dos Santos.
Situasaun ohin loron prosesu konstrusaun estadu hariku de’it ema balun, maibé povu kiik sira sai vítima iha prosesu dezenvolvimentu nasionál, tanba kondisaun ekonomia la sufisiente atu apoiu oan sira ba eskola.
Realidade hatudu ba avó Venáncio Bere-Lelo dos Santos (60) ho nia kaben Fernanda Ili-Mau (51), sira nain rua nia oan mane Mario de Jesus ho idade foin 18, tenke sai husi eskola hodi hein animal (bibi) tanba laiha osan selu eskola.
Avó Venáncio nia atividade moris lor-loron tuku katana ho baliu hodi lori fan iha merkadu, maibé bainhira lori too merkadu dala ruma ema la sosa tanba ema ladún presiza, maske fan ho folin baratu.
“Ha’u tuku katana, no halo baliu atu hetan netik $ 0, 25 ka $ 0.50 hodi hola kafé ho masin-midar,” espresa avó Venáncio ho oin triste ba lafake news iha nia rezidénsia Buikeu aldeia Atuaben Bobonaru, foin lalais.
Iha atividade kobertura jornalista lafaek news iha rezidénsia avó Venáncio nian observa katak uma laran ho kondisaun ne’ebé la dignu inklui kondisaun infraestrututra uma ladun di’ak, tanba didin hadak ne’ebé fera husi au lahuk burus husi laran ba liur, bainhira lafaek news tenta atu dada lia ho Mario de Jesus, maibe la konsege tanba ba hein hela bibi ho distansia dook husi uma.
Iha dadalia ne’e, avó Venáncio espresa ba Lafaek News katak nia kondisaun saúde ladun di’ak atu halo servisu todan, tanba idade avansadu laiha kbi’it hodi hadia fila-fali nia uma ne’ebé la dignu.
“Ha’u ho ha’u nia kaben laiha kbi’it atu hadia ami nia uma, no ami nia moris susar tebes atu sosa hahán no minarai hodi sunu iha tempu kalan, karik ema sosa ami nia fahi, manu, bibi, foin sosa foos no minarai, no ami atu lori produtu lokál ba fa’an iha merkadu maibé merkadu dook tebes,” avó Venáncio hakotu.
Jornalista : Juvita dos Santos
Editora : Nelya Barros
