Lafaek News—Konsultora postal municipal, Lília Melânia Barreto Fernandes, informa iha fulan Dezembru 2020, sei hala’o lansamentu portal municipal nian hodi garante tranparánsia ba sidadun hotu iha dezenvolvimentu Timor Leste.
Lília Melânia Barrreto Fernandes hateten, objetivu principal ba Portál Munisipál hanesan portál online ida asesu livre hodi monitorin projetu sira iha munisipiu nune’e siadaun sira iha munisipiu no komunidade enjerál bele asesu iha setór oi-oin iha prosesu dezenvolvimentu rai ne’e liu husi porta refere.
“Portal ne’e atu ajuda ita nia alin estudante sira, parseiru dezenvolvimentu sira, sosiedade sivil sira no investór sira karik presiza atu foti dadus ruma ka atu haree perfil munisipiu sira, entaun sira bele tama iha portál munisipál ne’e rasik” dehan Lília Melânia iha eventu deseminasaun ne’e, iha Timor Plaza, Suai Gala Room, tersa semana ne’e.
Nia esklarese, dalan atu asesu portal ne’e iha maneira ida mak loke pájina ofisiál portál munisipál nian, no maneira seluk liu husi pájina Ministériu Administrasaun Estatal nian hanesan, estatal.gov.tl, no iha pájina ne’e nia okos mak bele asesu ona baze dadus munisipál.
“Iha mós mapamentu investimentu iha kor kinur, signifika iha munisipiu sanulu resin rua inklui RAEOA iha hotu projetu ne’ebé lao hela, ita bele klick kada munisipiu hodi haree projetu ne’e no projetu ne’e hahú iha sá loron, gastus orsamentu ne’e hira no ita espera projetu ne’e bainhira mak remata” aprezenta Lília.
Entretantu aprezentadór MAE Benedito Escorial Fernandes relata, setór hirak ne’ebé define ona hodi tau iha portál municipal ne’e maka setór demografia, setór saúde, setór agrikultura, sósiu-ekonomika no enfraestrutura.
“Portál ida ne’e mosu tanba servisu hamutuk husi ministériu estatal no ita nia parseiru dezenvolvimentu PNUD, ne’ebé apoiu orsamenta husi Uniaun Europeia désimu millaun sanulu resin hitu dollar amerikanu, no motivu ida ne’e mak ita bele tau dadus iha fatin ida de’it” dehan Nia.
Nia afirma portál ida ne’e utiliza husi, nivél nasionál ba munisipál hodi prepara planu no orsamentu bazeia faktus, ba setór privadu sira sei investe no tarjetu di’ak liu atu halo dezenvolvimentu ruma iha munisipiu, parseiru dezenvovolvimentu sira Uniaun Europeia, UNDP. Nune’e iha futuru UNDP entrega ba administrasaun estatal no administrasaun estatal mak nain no jere ba portál ida ne’e.
“Prosesu dezenvovimentu portál munisipal primeiru mak ita halo selesaun dadus temátika no kolabora ho guvernu sentrál estatístika no parseiru dezenvolvimentu sira hodi rekolla dadus, nune’e ita mós servisu hamutuk ho ita nia parseiru internasionál sira hanesan, banku mundial, ILO no USAID” afirma Benedito.
Enkuantu portál munisipál foin hala’o iha tinan kotuk iha oitavu governu konstituisionál, no IT ho administrasaun munisipiu mak servisu iha munisipiu hodi rekolla dadus, nune’e portál ne’e sei halo lansamentu dadus iha dezembru 2020.
Jornalista : Juvita dos Santos
Editora : Nelya Barros
