Loron 13/12/2022, Domingos Maia.

Maluk manorin sira:
1. Ohin loron, inan-aman no sosiedade lakon tiha nosaun lulik kona-bá prinsípiu-loos ezame nian. Sira-nia vizaun ka perspetiva kona-bá hela-klase (tinggal kelas) ou repetente ne’e negativu, lakon fama (gengsi) hosi oan no inan- aman sira.

2. Oan la falta eskola, kumpri ona halo atividade extrakurikular, selu tiha ona propinas mak iha tiha ona garantia atu liu exame. Presiza harene katak parte ida ne’e administrasaunnian; la’ós parte akadémiku nian.
Prinsípiu ida nebé loos mak inan-aman sira hein atu: Oan soi matenek nebé justu, nakunu, komprovadu tiha iha ezame nasional no ikus, mak foin hakerek/haloot (guarda/arquiva) tiha iha dokumentu ida hanaran sertifikadu ne’e.
Nune’e, ezame la’ós sistema ida uluk fó kastigu ho marka reprovado, maibé sai biban-di’ak ida atu halo rekursu ka hadian/haklean fali (repete). Basá buka siénsia mak importante liu, la’ós buka sosa sertifikadu-mamuk.

Bazeia ba esperiénsia akompaña sistema edukativu TL nian durante tinan barak, observa katak
manorin sira, enjerál, satán diretora ida, tenke tane hamutuk sira-nia dignidade profisionál nu’udar manorin maske, dala wa’in, sira tenke hasoru dezafiu-boot hosi inan-aman sira no sosiedade enjeral.

Tan ne’e, presiza hametin liu tan espírito heroismo manorin sira nian atu luta ba prinsípiu edukasionál nebé loos no soi ema; la’ós atu maneira- falsa oin-oin hatún no hamate fali ema nia dignidade- moris.

Basá vizaun ka perspetiva inan-aman no sosiedade nian salah/kleuk hela kona-bá prinsípiu loos edukasaun nian maka:

1. Inan-aman sira ezije oan sira tenke liu/pasa ezame (atu la bele dehan, karik tan beik?) maske ladauk domina maréria.

2. Iha sira nia kakutak ni hanoin nebé kontaminadu tiha ona: Atu hetan de’it mak sertifikadu ida, nebé hahisi ho notas-falsas, katroladas no “excelente”, maibé alumni estudante hosik eskola ho kakutak mamuk hela.

3. Siénsia ka buat-matenek nian la bele sosa ho osan, maibé ho hahalok badinas no esforsu rasik hosi estudante sira no tau- matan nakunu hosi inan-aman hodi akompaña lala’ok-loos hosi oan sira. Se la loos, bele hato’o krítika ba diretór ka diretu ba manorin- klase.

Tan ne’e, inan- aman sira balun mai hasoru manorin sira ho atitude intimidasaun, tane-liman (mendigo/pengemis) husu pasa ezame no buka sosa de’it pasajen-klase ba oan hosi manorin balun.

Manorin sira mós tan ho tauk, ou kaan osan no ka tan sentimentu familiar, dala wa’ain, fó subar de’it pasajen klase. Hahalok hurak ne’e, tuir loloos, konsidera ona krime tan hatún liu dignidade estudante, manorin no inan-aman sira nian.

Siénsia ne’e, fihir hosi aspetu étika- morál mak nia lialoos ida.
Tan ne’e, manorin sira tenke iha gana’i no hamtauk (temor), la bele manipula siénsia basá nu’udar lialoos Ukun-fuan bandu : “Keta bosok”. No Na’i sei husu konta atu justifika no responsabiliza iha Nia nia futar oin.

Belun manorin sira:
Fiar ne’e luta ida ho nia risku -todan sira todan no barak. Maibé bainhira brani ho korajen luta no tahan-an to’o rohan, mak sei hetan prémiu (garardão) lalehan nian.
Se balun hatudu tiha ona mak iha ona garantia soi sentidu-klean moris Advento no Natal nian.
Boas Festas!