Loro Domingu, 11/12/2022. Domingos Maia.
Ho lia-inan Mambae dehan:
— “Hihir maun- tén/kó maun- oen” (fihir manu-tén no haree manu- ain) ne’e mak parte ida hosi prátika ritual- kultu tradisional TL nian.
Sei iha tan forma oin-seluk hanesan:
— “Dó- mauntelon” (doko -manu tolun), “tar bula ain/fó muk’ain” (fera bula kain ka hudi-ka’in); ne’e hotu presiza prezensa hosi lia-na’in ida. No sei iha tan forma-oin superstisiiza sira seluk tan hnsn:
— “Gum bula” (sukat ai ka surik); “ref-niman” (sukat liman fukun); “lu-maula” (sihik malus-mean), nsst. Ne’ebe ema baibain, balun bele pratika mós aktu ida ne’e tuir de’it nia konviksaun hodi husu sinal ou konfirma lia ruma ka problema ruma: se loos ka sala, di’ak no aat.
Maibé buat nebé loos no di’ak ne’e lao tuir ema nia fiar no konsiénsia nebé loos no moos; no prátika hirak ne’e, dala wa’in, uza nu’udar meiu/maneira ho nia sentidu simbóliku ou sakramentália no bele mós psikolójiku atu soi ema ruma housi sikon- moras: psikiku, fíziku, mental no espiritual hodi hetan fali isin-di’ak ka
saudável; la’ós atu haketak no halo-aat malu? Basá iha mós intensaun-aat atu hasoru, hamonu no hamate nia funu-baluk ruma.
Tan ne’e, ho báze bíblika no teolójika doutrinal, ema fiar-na’in ida tenke leno uluk nia fuan no neon hodi haketak tiha prátika ida sala no aat hosi ida nebé loos no di’ak.
No dala ida tan, ba ema sarani, presiza, liu-liu, mak roman Espírito Santo, katak Maromak ifa nebé horik iha ema fuan no neon mak sai mata-dalan hodi hatudu dalan-naroman ba nebé. Basá diabu mós bele horik iha ema- nia fuan no laran bainhira ema rasik mak loke oda- matan luan, hamamuk tiha fuan, halirin tiha klamar, hafoer tiha nia neon no hakman tiha nia kbi’it fiar tomak hosi Maromak Espírito Santo atu tulun ema luta hasoru babeur-aat sira mundu nian (Mrk 12: 28- 32).
Saida mak maluk matan- dook sira pratika daudaun ho “haree manu- ten” ne’e nia báze-fiar mak saida loos no hosi nebé lós? Basá ema bele husu tuir: Ida ne’e mai hosi ema nia an kah? Mai hosi kbi’it-aat diabu nian kah? Ou mai duni hosi Maromak? Ida ne’e fila fali ba sira-nia konsiénsia no fiar rasik.
Se maluk sira ne’e mak ema fiar-na’in duni, tenke tahek/tais didi’ak uluk lai kakutak no neon atu keta monu leet letek ba babeur diabu nian.
Mai ita reza basá pratikante sira ne’e, tuir ha’u haree, sira la’ós ema fiar-na’in loloos. Tan ne’e, sira tenke ho hakraik-an hakribi tiha salan no husu perdaun no tulun ba Aman laranluak atu hakfilak-an tiha lalais, iha Tempo Advento ne’e.
Agora haree maluk sira: Realidade la hatudu sai tuir sasi’ik ho urat manu-tén. Ida ne’e la’ós buat-foun, iha tradisaun. Saida tan mak imi sei komenta?
a) Halo urat fihir manu-tén mak bosok-tén kah?
b) Hahalok ne’e duni mak hatudu katak sei iha ema fiar-falsu?
c) Ou Maromak loos la iha sira fuan no neon-laran?
Reflete didi’ak ba!
Hatoo ksolok Boas Festas Natal no Tinan Foun ida nebé nakunu ho roman dame nian! Amin.
