Lafaek News (Bali)–28-Setembru 2022, Prezidente Repúblika, José Ramos-Horta ho ekipa Prezidente Indonézia no Governadór Nusa Tenggara Timur – NTT Viktor Laiskodat, deskuti Kriasaun Zona Komérsiu Livre no Parke Industrial iha Rejiaun Autónoma Oecusse.
Tuir Xefe Estadu, ninia homólogu Joko Widodo prefere, atu Indonésia apoia ekonomia Timor-Leste hodi la’o ba oin, ho apoiu husi entidade oi-oin.
“Projetu rua ne’e, ita bele hateten, governu ba governu, business ba business, signifika, parte rua envolvidu, ida mak governu Indonézia no Timor-Leste, seluk mak seitor privadu husi Indonézia no Timor-Leste, para projektu rua ne’e benefisia Timor-Leste, ita rasik mak tenke badinas, bo’ok an, mobiliza an, mobiliza seitor privadu nasionál”, tenik Xefe Estadu.
Prezidente Repúblika mos defende nesesidade atu governu Indonézia apoia seitor privadu no haruka nafatin ekipa empreza estatal Indonézia (Badan Usaha Milik Negara – BUMN) atu kontinua partisipa ativu iha prosesu dezenvolvimentu Timor-Leste.
Xefe Estadu hateten, governu Indonézia delega Ministru Koordenadór Luhut Panjaitan, hodi lidera Kriasaun Zona Komérsiu livre no Parke Industrial iha Rejiaun Autónoma Oecusse.
“Prezidente Joko Widodo interessante no motivadu teb-tebes, delegasaun ida husi Jakarta mai (iha Bali) sira hateten, Prezidente Joko Widodo foin dadaun, bolu sira no ko’alia ho sira no iha semana ida nia laran, Prezidente Joko Widodo sei telephone ba Ha’u no ohin kalan duni, ko’alia telefone ho Ministru Koordenadór Luhut Panjaitan, nia mak sei reprezenta Indonézia ba hodi koordena projektu ne’e” subliña Xefe Estadu.
Prezidente Horta husu ba governu, liu-liu Ministériu responsável ba projektu ne’e, hodi deskuti detallu projektu ne’e ho Indonézia, tamba Prezidente Repúblika bele halo diplomasia ekonómika, maibé labele assina akordu ruma.
“Ita labele la’o neineik, ita atu tama dadaun ba ASEAN, se ita la la’o, la asselera ita nia prosesu dezenvolvimentu ekonómiku, ita lakonsege hanesan toman ASEAN nian, ne’e duni Prezidente Jokowi hakarak, book no book lalais, ajuda ita ho ita nia ekonomia” konklui Xefe Estadu.
Durante Vizita Prezidente Repúblika bá Indonézia, membru governu ne’ebé hola parte iha delegasaun, assina akordu iha seitór agrikultura, ekonomia no transportes.
Projetu seluk ne’ebé sei iha faze diskussaun mak apoiu kriasaun komité konjunta iha fronteira, apoia dezenvolvimentu ekonómiku iha Fronteira, Kriasaun Zona Komérsiu livre no Parke Industrial iha Rejiaun Autónoma Oecusse.
Jornalista : Rita Moniz
Editor : Agapito de Deus
