LafaekNews—Reprezentante Manajementu UNDP, Libória Fátima Sávio afirma, situasaun ohin loron kontinua nakfilak an radikal, tan ne’e governu presiza konsidera aspeitu mudansa klimátika atu harii infraestrutura reziensia atu hasoru mudansa klimátika.
“Hanesan ita hotu hatene, kada tinan ita hasoru dezastre sira hanesan rai-rahun naruk , udan boot, inundasaun, erosaun, anin boot no nivel tasi sa’e, klima muda da-daun, ita mós presiza troka ita-nia moris, no dalan ne’ebé ita halo dezenvolvimentu, nune’e, dalan ne’ebé ita harii infraestrutura mós tenke muda ita presiza konsidera aspeitu mudansa klimátika atu harii infraestrutura reziliente hasoru dezastre sira ne’ebé kauza husi klima. ” Dehan reprezentante Manajementu UNDP, Libória Fátima Sávio iha Novo Turismo, tersa (23/04/2024)
Reprezentante UNDP ne’e akresenta katak, UNDP halo servisu hamutuk parte governu Timor Leste hanesan Ministériu Administrasaun Estatál, Ministériu Agrikultura Peskas no Floresta, Ministériu Turizmu no Ambiente, hodi servisu hamutuk haree ba situasaun dezastre naturais iha fatin-fatin ho ida ne’e projetu hetan fundus husi FKD, ne’ebé realiza iha tinan 2020- 2026, Objetivu atu proteje komunidade rurál sira no sira-nia riku-soin fíziku husi dezastre ne’ebé kauza husi klima liuhusi hasa’e reziliénsia klimátika ba infraestrutura rurál vulneravel eskala ki’ik iha munisípiu alvu 6 ho alvu ho benefisiáriu direta 175,840, estimativa 15% hosi totál populasaun Timor-Leste nian.
Entretantu, Sekretáriu Estadu Dezenvolvimentu Lokal, Matéus W. Dos Santos Tallo, heteten parte governu ne’ebé sai parseiru ho UNDP hodi halo atividade ne’ebe importante tebes no servisu liu ba dezenvolvimentu iha area Local no foka liu ba mudansa klimátika ne’ebé mosu, tanba ne’e husi autoridade lokál sira bele ajuda hodi buka dadus.
“Ha’u hanoin iha atividade ida ne’e ohin ninian importante tebes liuliu ita nia parseiru UNDP parseiru dezenvolvimentu administrasaun estatal ninian iha atividade ida ohin ne’e liga liu ba sobre dezenvolvimentu rural nian ho ninia implikasaun sira mudansa klimatika, ha’u hanoin ida ne’e importante tebes tanba liu husi ita ninia governu lokál lideransa Komunitario sira autoridade lokál sira bele ajuda sira husi dadus ne’e depois bele hadia di’ak liu efisiensia do servisu ba governu ninian liuliu projetu sira liga iha liga liu ba área rural” haktuir Sekretáriu estadu SEDL Matéus W.dos Santos Tallo
Jornalista : Aniceto Dias
Editor : Agapito de Deus
