Lafaek News—Organizasaun PRADET (Pshycology Recovery and Development East Timor), konvida membru familia sira ne’ebé hasoru problema moras mentál, hodi fo hanoin no fahe esperiensia oinsá bele eduka familia sira ne’ebé hasoru problema moras mentál iha sosiedade.
“Tratamentu moras mentál hanesan mós tratamentu fiziku, entaun bainhira kliente sira ne’ebé iha ami nia sentru rehabilitasaun hakarak atu ba óspital ami lori sira ba, maibé ami la obriga ami sempre halo tuir nia no husu nia rasik mak deside, nune’e ami mós esplika kona-ba aimoruk nia importansia, maske ami laos adeptór médiku atu nune’e sira labele duvidas, no ami mós halo esplikasaun ba sira katak aimoruk de’it sei la fo tratamentu ba ita nia moras mentál, presiza suporta husi familia sira”, dehan Richa Nela E. de Oliveira ba lafaek news hafoin partisipa semináriu iha uma mahon Xanana Gusmão Reading Room, sesta 13/11/2020.
Counselor Psychology PRADET ne’e hateten, PRADET iha atividades hamutuk pakote 7 ne’ebé bai-bain halo iha sentru reabilitasaun ne’e no pakote hirak ne’e mak hanesan, pakote ijéniku, meditasaun, tein hamutuk (cooking class), arte, alfabétika, suku, no pakote jardin.
“Iha ami nia fatin ami hahú asesmentu, ami konsidera tebes kliente nia desizaun, ami halo tratamentu iha sentru rehabilitasaun PRADET bazeia ba Diagnostiku ne’ebé doutor sira fo, ami mós ko’alia ba nia maske nia moras mentál maibé ne’e konfenensialidade, tanba maské nia kondisaun nune’e nia neon sempre lao no hanoin mak fahe ba rua, dalabarak liu hanoin negativu no ituan liu hanoin pozitivu,” dehan Richa Nela ba jornalista sira foin lalais ne’e.
nia relata ba jornalsta sira katak kliente sira ne’ebé mai kontinua atividade iha sentru reabilitasaun normalmente husi klínika Bairo-pite no HNGV, tanba kliente sira tenke ba hasoru uluk doutór sira ne’ebé nain ba moras ne’e hodi detekta nia diagnóstiku hafoin familia sira mak deside lori mai sentru reabilitasaun PRADET.
Iha fatin hanesan, Koordenadór programa asisténsia moras mentál (PAMM) Nicolau V. Ximenes informa, iha 2017 PRADET hamosu hanoin ida ho atividade hanaran dalan ninin, hodi hari’i konfiansa ho maneira, vizita sira, kolia ho sira fornese mó hahan báziku, husi ne’e PRADET kontinua oinsa mak bele buka nia familia hodi konekta.
“Husi dadus ne’ebé ami nia ekipa halo hahú husi segunda to’o sesta, ami rekolla ona ema moras mentál hamutuk 98 hahú husi Bekora tama to’o Tasi-tolu, sira mai husi munisipiu diferente, signifika katak ita nia maluk ne’ebé abandona barak ona no númeru aas tebes iha Dili”, dehan Nicolau V. Ximenes.
Nia haktuir tan, dezafius ne’ebé PRADET hasoru mak wainhira halo vizita ba maluk moras mentál sira iha dalan ninin, iha preokupasaun husi ema balun katak tenke hari’i uma provizóriu ida ba sira, maibé sé mak halo atendimentu akomulasaun provizoriu ruma hodi hetan tratamentu dignu depois hodi fila ba familia, nune’e dezafiu ne’e mak ema hotu nia preokupasaun.
“Husi maluk 98 ne’ebé ami hasoru iha nain 6 mak ba fali uma ona, maibé nain haat hela metin iha uma, nain rua sei lao pasiar, tanba ami lori familia, familia sira sempre hato’o sira nia preokupasaun katak loron oan ba eskola, aman ba servisu, inan ba fila liman entaun sé mak atu kontrola nia hodi fó aimoruk” hakotu Nia.
Jornalista : Juvita dos Santos
Editora : Nelya Barros=’
