Bobonaru-(Lafaek News)—Maria Fátima tinan 54 oan nain 2, husi postu administrativu Maliana munisípiu Bobonaru, sente triste impaktu husi pandemia covid-19 afeta nia rendimentu tuun kada loron.
“Durante surtu COVID-19, ema sosa modo loron ida tomak hetan $.5.00 too $.10.00 de’it, modo ne’ebé mak ema la sosa sai dodok no estraga hotu no modo ne’ebé ha’u fa’an sosa tutan hosi ema seluk no fan fali, hodi sustenta família nia moris,” dehan Maria Fatima, iha merkadu Maliana Kinta, 12/11/2020.
Nia antes seidauk mosu virus korona ne’e iha Timor Leste, ema hotu hatene katak roda ekonomia la’o di’ak, produtu iha merkadu folin tanba ema hotu hakbseik ba iha merkadu, maibé ikus ne’e ho prezensa covid-19 kompraor laiha tanba ema ida-idak nia rendimentu kada loron laiha.
Iha fatin hanesan, negosiante Francisco Dos Santos informa, sasán folin, uluk ho agora la hanesan, tanba surtu COVID-19, bainhira estadu Timor-Leste hahú Dekreta Estadu Emerjensia ba dahuluk.
“Modo sira ne’ebé mak ami borong to’o $.40.00 hanesan ne’e ami fa’an fali, dala ruma folin to’o de’it $.7.00 ou $.8.00 karik to’o loron tolu ou haat ami bele hetan liu $.40.00 dalaruma mos la to’o,” dehan nia ba lafaek News.
Francisco argumenta, Uluk COVID-19 seidauk iha modo sira folin di’ak, tanba bele hetan osan to’o $.60.00 ou $.70.00 menus liu mak $.40.00.
Iha sorin seluk Gestor Merkadu Postu Maliana Miguel Armando dehan, negosiante sira nafatin kumpre no tuir regulamentu estadu emerjénsia, ne’ebé Ministériu Saúde no Organizasaun Mundial Saúde fo sai.
“Durante ne’e hanesan baibain maibe komunidade sira balu la mai fa’an sasán tanba pandemia COVID-19, maibe iha ne’e nafatin halo tuir regras ne’ebé hatún husi Ministériu Saúde”, Gestor Maliana, Minguel Armando realsa.
Tuir jotnalista Lafaek News nia observasaun iha terenu nota katak, produtu ne’ebé negosiante sira faan balu la folin no sai dodok deit iha sira nia faan fatin.
Jornalista : Rita Moniz/Rosa Fernandes.
Editora : Nelya Barros
