Bobonaru-(Lafaek News)—Populsaun 2.000 iha aldeia Solu-Golo, suku Holsa, Postu Administrativu Maliana, Munisípiu Bobonaru, obriga-an tenke konsumu bee mota hodi tein, hemu, hariis no hodi fase ropa.
Komunidade Aldeia Solu-golo, Vitor Martins, iha nia parte, ezije ba Governu atu tau matan ba povu nia moris hodi kanaliza bee moos ba suku Holsa, Postu Maliana, Munisípiu Bobonaru, nunee komunidade labele halerik ba bee moos.
”Ha’u husu ba ita nia Governu atu tau matan ba povu sira tanba ami susar liu ba bee moos, atu konsumu bee tenke lao to kilómetru ida (1 km) mak bele hetan bee moos hodi sustenta ami nia nesesidade loro-loron,” dehan Vitor ba jornalista iha nia rezidénsia, Solu Golo, Bobonaru, kinta, 12/11/2020.
Nia dehan, Bainhira iha tempu bai-loron Aldeia Solu Golo susar tebes atu asesu bee moos, tanba bee matan tolu ne’ebé iha mota laran sei maran bainhira bai-loro naruk.
Iha sorin seluk komunidade Aldeia Solu-Golo, Casimiro Gomes informa, durante ne’e sira asesu ba bee posu maibé bee posu ne’e maran tiha ona, nune’e susar ba sira atu asesu bee moos hodi konsumu.
“Durante ne’e sira asesu ba bee posu no asesu ba bee mota, wainhira bee posu maran, komunidade hotu-hotu tenke uza gerobak dudu ba mota hodi uza ba nesesidade loro-loron nian,” Cazemero relata.
Nunee mós, xefe Aldeia Solu Golo, Suku Holsa, Postu Maliana, Munisípiu Bobonaru, Carlito Barreto, iha nia parte sente preokupa, tanba nia komunidade konsumu de’it bee matan tolu iha mota laran
“Ami husu bei-beik ba Governu maibé nafatin tinan barak sira nunka tun mai haree bee ne’ebé povu sira uza. hanesan lideransa lokál ami hein desizaun hosi Governu de’it, labele halo buat ida,” xefe Aldeia Carlito.
Hatan ba komunidade nia pekupasaun ne’e, Diretór Servisu Agua e Saneamentu (SAS), Bobonaru, Adriano da Cruz iha nia parte dehan, prekupasaun komunidade nia ne’e normal.
“Ema barak halereik kona-ba bee mos ne’e normal, tanba SAS hala’o nia kna’ar bazeia ba rekursu ne’ebé iha,”dehan Diretor SAS Bobonaru.
Adriano argumenta, Komunidade sira ne’ebé atu hetan bee mos tenki ba rejistu iha SAS no selu iha banku se lae sira multa tuir lei ne’ebé vigora, tanba SAS iha parte tékniku la’os responsavel ba orsamentu atu hadia bee ba komunidade sira, komunidade ne’ebe la asesu bee mos SAS iha ona planu no deskobre ona bee matan sira, maibé atu implementa ne’e depende ba aprovasaun orsamentu iha leten se la aprova SAS labele halo buat ida.
Nia dehan, governu entrega bee ba komunidade entaun SAS fó asisténsia tékniku maibé sira ne’ebé iha aldeia Solugolo monta ona metrajen, maibé balu bee sai balu la sai, Tanba komunidade la disiplina regra halo intervensaun direita hodi estraga pipa iha tempu kalan.
Tuir dadus iha Aldeia Solu-Golo, uma-kain hamutuk 583 no populasaun 2000 resin mak uza bee matan tolu iha mota laran no distánsia husi uma ba bee matan iha mota laran kuaze kilómetru ida (km1).
Jornalista : Orlando Magno
Editora : Nelya Barros
