Lafaek News—Prezidente Repúblika reprezena Xefe Kaza Sivil, Bendito dos Santos Freitas, kinta (13/04/2023) asina nota entendimentu (MoU) ho Ajénsia Mary Mackillop hodi promove kultura lee iha komunidade nia leet.
Xefe Kaza Sivil Prezidensia Repúblika Bendito dos Freitas haktuir iha nia intervensaun, Prezidénsia Repúblika nu’udar orgaun Estadu númeru ida, iha nia polítika prinsipiu ne’ebé importante parseria estratéjika atu bele dezenvolve didi’ak rai no estadu inklui rekursu uman
“Ita ohin halibur iha ne’e atu bele reforsa ita nia parseria servisu hamutuk Mary Mackillop ho Prezidensia Repúblika, Prezidensia Repúblika nu’udar orgaun Estadu númeru ida, iha nia polítika prinsipiu ne’ebé importante parseria estratéjika atu bele dezenvolve didi’ak ita nia rai no estadu liu-liu kona-ba rekursu umanu,” Bendito Freitas afirma.
Eis SEFOPE dahuluk ne’e dehan, iha esperénsia balun liu ona, Prezidensia Repúblika selebra ona akordu ho Care Internasionál kona-ba jornál Lafaek, depois tuir mai ho Plan Internasionál no ohin Mary Mackillop.
“Ita hotu-hotu hamutuk suporta ita nia insiativa hotu-hotu ne’ebé di’ak atu bele kultiva ka kuda prátika leitura ne’e importante tebe-tebes, ita iha mundu ida globalizadu modernu tebe-tebes leitura ne’e mak oksijenu moris nian no koñesimentu globál ne’e importante tebe-tebes,” dehan nia.
Iha parte seluk Diretór Ajensia Mary Mackillop sente orgullu iha momentu istóriku ida ne’e, bele apoiu insiativa Prezidente Repúblika nian ne’ebé hakarak habelar informasaun lee nian ba to’o iha área rurais.
“Ami nia tarjetu projetu sira ne’e maiória área rurais, espera katak ho asina nota intendimentu ida ne’e bele mellora di’ak liu tan ita kooperasaun mezmu tempu mós mellora di’ak liu tan labarik, mestri no mós komunidade sira nia konsiénsia bele hasa’e sira nia koñesimentu importánsia husi lee no mós hatoman an lee”, dehan Diretór Mary Mackillop
Entretantu, nota intendimentu ne’e objetivu atu promove hatoman ema lee no atu motiva hakerek na’in sira, Mary Mackillop iha rekusu ne’ebé barak, no halo ona nota intendimentu iha 2014 ho Ministériu Edukasaun aprova Mary Mackillop nia livru 72 ne’ebé bele adopta iha kurikulum nasionál ba aprendijazen aula ninian.
Jornalista : Rita Moniz
Editór : Agapito de Deus
