Lafaek News—Prezidente Repúblika, Jose Ramos Horta orgullu tebes ho graduantes Universidade Nasional Timor Loro sa’e (UNTL) hamutuk rihun ida atus ha’at ualu(1408)ne’ebe simu hetan ona graduasaun.
“Parabens ba nai reitor no korpu dosente hotu hotu staff UNTL nian ne’ebe tau matan ba labarik sira no joven sira tinan hirak nia laran fahe sira nia matenek koñesimentu ba jove graduasaun (UNTL) sira ne’e, liliu pai mãe sira no alin sira orgullu tebes, balun kontinua estuda no sira balu kontinua ba buka moris nian hanesan bai–bain ita hotu hatene balun iha sorti balun laiha sorti mezmu balun sorti laiha la lakon esperansa kontinua hatudu nafatin,” Horta afirma ba graduantes sira iha seremonia solene Ba dala XXVlll, tersa iha CCD, (/11/04/23)
Iha biban ne’e, Xefe Estadu hatoo mensajen ba graduantes UNTL atu labele deziste, maske hasoru difikuldade oi-oin, maibé nafatin hakas an ho matenek ne’ebé hetan husi UNTL.
“Ha’u hakarak hateten labele dejiste mesmo que hetan difikuldade oioin haree ezemplo lider nasional sira liliu Maun Bo’ot Kay Rala Xanana Gusmão iha tempu luta difisil tebes mehi nafatin i labele mehi de’it, nafatin halo. hakas an nafatin ho matenek ne’ebe mak iha espera loron ida sei hetan susesu ne’ebé mak di’ak,“ katak aman ba nasaun ne’e.
Iha sorin seluk Minitru Ensino Superior Siénsia Kultura Longinhos do Santos, reforsa katak graduasaun ba estudante sira hanesan momentu importante liu iha universidade hotu.
“Ida ne’e sai nu’udar onra bo’ot ida mai hau hodi prejidi seremonia graduasaun ba estudante sira graduasaun signifika instituisaun ne’e hatene duni kria kondisaun ne’ebe nesesáriu ba nia estudante sira hodi aprende no responde positivu ba ezisénsia akademika ne’ebé liu tiha ona durante tempu formasaun nian,“ Longuinhos reafirma.
Governante ne’e argumenta, UNTL únika Universidad públiku ne’ebé iha nia nia misaun atu lidera no sai ezemplu ba sistema hotu ba ensinu superior iha Timor Leste.
Entretantu total graduantes ne’ebe mak simu graduasaun hamutuk rihun ida atus ha’at walu (1408) kompostu husi Fakuldade sia (9), Fakuldade Siénsia Sociais, Edukasaun Arte Humanidade, Enjenária Siénsia no Teknolojia, Direitu Jerál, Agrikultura, Medisina ho Siénsia Saúde, Ekonomia Jestaun, Siénsia Exatas no Filosofia.
Estajiadu : Felix Fernandes
Editor : Agapito de Deus
