LafaekNews-Postu Saúde Afaloicai, suku Afaloicai, Postu Admistrativu Watu-Carbau munisípiu Vikeke, bainhira inan isin rua partus sira pasiénsia tula de’it ho motor ba Postu Saúde Afaloicai hodi hetan tratamentu, tanba laiha ambulánsia atu transfere ba postu Saúde.
Responsavel Postu Saúde, Afaloicai, Leão Horacio Guterres, hateten, durante laiha ambulánsia ida hodi transporta inan isin rua sira ba postu saúde, uainhira partus iha área rurais sira entaun komunidade sira uza de’it motor mak tula lori ba postu saúde Afaloicai hodi hetan tratamentu.
“Iha postu saúde ne’e laiha Ambulánsia ida desde uluk to’o agora entaun kuandu inan isin rua sira partus, familia sira buka meius lori motor mak tula de’it ba postu saúde sira hodi hetan tratamentu,”dehan Responsavel Postu Saúde, Afaloicai, Leão Orasio Guterres, ba lafaek iha segunda-feira, iha postu saúde Afaloicai, Postu administrative Watu-Carbau Munisípiu Vikeke, 22/11/2021.
kordenadór ne’e hatutan,durante ne’e difikuldade ne’ebé mak postu saúde Afaloicai hasoru mak, kondisaun Estrada ne’ebé mak ladi’ak hodi difikulta Servisu Pesoál saúde sira iha postu saúde Afaloicai
“Problema ne’ebé ami hasoru maka Estrada ne’ebé mak ladi’ak entaun ami lori motor mak ba foti ai-moruk masa ida masa rua iha sentru saúde watu-Carbau hodi lori mai fo komunidade sira iha ne’e”esplika Leão.
Enkuantu Postu saúde refere durante ne’e hala’o atendementu ba populasaun uma kain atus tolu sanulu resin sia (319) inkluí halo mós atendimentu ba suku seluk, tanba ne’e susar servisu pesoal saúde sira atu kontrola komunidade sira.
koordenadór ne’e rekomenda, ba governu liu-liu ministériu saúde(MS) atu bele haree situsaun refere nomso rekomenda atu konstrui postu saúde Afaloicai tanba kondisaun edifisiu refere agora da-daun kondisaun ladi’ak ona.
To’o nutisia ne’e publika lafaeknews.com seidauk komfirma parte kompetente kona-ba asuntu ne’e.
Jornalista : Abekha Rai-Husar
Asisten editor : EgidioNono
