Lafaek News—Populasaun suku hamutuk 6 kompostu husi aldeia 19, postu administrativu Atauro munisípiu Dili, ho antusiasmu partisipa másimu iha akampamentu PERMATIL hodi kuda bee hamoris komunidade liu hui kee debu, satan kadalak no terrasu.
Diretór Ezekutivu Permacultura Timor Leste, Ego Lemos, sente orgullu ho partisipasaun komunidade Atauro ho vontade aas tebes iha atividade PERMATIL ne’ebé la’o di’ak tebes ba atividade kuda bee, kee debu foun no rehabilitasaun debu natural inklui halo terrasu.
“Permatil kontente tanba Atauro konsege hatudu ezemplu ida-ne’ebe diak. Hahu husi Prezidente Autoridade Atauro, nia estrutura PAM, Xefe Suku, Xefe Aldeia, lideransa relijiozu no joven sira ativu tebes hodi hala’o programa Kuda Bee Hamoris Komunidade iha Atauro tomak,” Ego Lemos ba Lafaek News iha nia kna’ar fatin, segunda semana ne’e.
Ego Lemos haktuir, Komunidade Atauro hatudu sira nia esforsu maka’as hodi hala’o atividade oi-oin, konservasaun rekursu bee, proteje balada fuik sira, no kuda ai-horis tipu konservasaun oi-oin.
Tuir nia, Programa konservasaun rekursu bee hahu iha Atauro iha 2016 no agora konsege hamoris Bee Matan liu 9 no tuir sasin hosi João Barreto, mestre no komuidade Aldeia Baruana informa katak nia posu ne’ebé uluk bee masin, tanba dezde 2019 sira ke’e posu filtrasaun no satan kadalak, rejultadu mak nia posu 2 agora bee mida ona.
Atauro PermaYouth camp hala’o iha 21-25 Janeiru 2025, Total partisipanteJuventude (feto no mane) Atauro nian 152 no Joven hosi Paroquia Balide 24, Atauro Perma Youth Camp organiza hosi autoridade munisipiu Atauro ho apoiu téknika hosi Permatil no Asosiasaun PermaYouth Timor-Lorosa’e.
Tema ba Atauro PermaYouth camp 2025 “Kuda Bee Hamoris Komunidade”, tematiku 3 (Debun, Satan Kadalak no Terrasu), Partisipante sira mai husi Suku 5 no Aldeia 19. Durante akampamentu partisipante sira kontente loos hetan teknika hodi konserva filafali rekursu bee iha Atauro tomak, apoiu finanseiru ba Atauro PermaYouth camp mai hosi DREAMS ASIA, Permatil no UNSW
Molok ensera akampamentu Permatil no Asosiasaun PermaYouth Timor Lorosa’e entrega kedas ekipamentu serbisu ba Aldeia 19, tanke bee Rotomor @5200 hamutuk 23 no kanu masa (polypipe) @200 metru hamutuk rolu 38 ne’e ba Atauro tomak.
Ekipa kobertura : Lafaek News
