Lafaek News—Autoridade Portuáriu Timor-Leste, Institutu Públiku (APORTIL, I.P) Prevé orsamentu ba manutensaun ró Berlin Nakroma hamutuk $786.000, iha ne’ebé hahú husi fulan Outubru tinan 2024 iha Surabaya Indonesia no ohin loron 11, fulan Marsu tinan 2025 ró Berlin Nakroma fila hikas mai Timor-Leste.
Tuir Prezidente Administrasaun APORTIL, I.P, José de Oliveira Leong, informa katak agora dau-daun ró Berlin Nakroma fila hikas mai Timor-Leste, hafoin halo manutensaun kleur iha Surabaya Indonesia, maibé ohin loron to’o iha Dili, alende ohin to’o iha ne’e sei taka metin tuir autoridade nia rekomendasaun no loron aban mak sei loke hodi halo inspensaun ba ró Berlin Nakroma.
“Ró Berlin Nakroma ba halo manutensaun iha Surabaya Indonesia, tanba nia motor ida falla mak lori ba, ne’ebé ba ne’e hadia kuaze hotu kedas, hadia tuir doklis ne’ebé mak husi parte tekniku nian fó sai, husi ne’e mak ita tenke tau orsamentu ne’ebé ho montante bo’ot hodi halo manutensaun ba ró Berlin Nakroma, tanba iha ne’eba ne’e la’os hadia iha parte ida de’it, maibé hadia husi nia motor laran to’o liur, alende halo manutensaun ba ró Berlin Nakroma ne’e rasik kuaze fulan tolu ka ha’at nia laran no ohin fila hikas mai Timor-Leste ”, José de Oliveira Leong, relata ba jornalista Lafaek News, iha Portu Dili, Tersa, 11/03/2025.
Ró Berlin Nakroma, iha makina tuir rekezitu Sistema numerasaun ne’ebé halo husi Organizasaun Internasional Maritima (IMO), iha ne’eba makina rua hanaran main engine, iha ida mak hetan fallansu, husi ne’e mak ekipa teknika sira foti dadus hodi halo aprosimasaun ho PT, Dewa Ruci Agung, nia tekniku.
“Orsamentu ba manutensaun ró Berlin Nakroma, la sa’e la tun, orsamentu nafatin, tanba antes ne’e média sira públika kona-ba orsamentu ne’e rasik dehan adisional, maibé laiha adisional ba orsamentu ne’e rasik, tanba ró ne’e rasik bainhira to’o ona iha kompaña ne’e, kompaña ne’e rasik mak sai responsabiliza, tanba ita halo akordu antes ho sira molok ró aranka ba Surabaya Indonesia”, José haktui.
Sorin seluk, Kapitaun Jerál Portu Dili, Rogeiro Soares, informa katak husi autoridade ne’ebé atu halo inspesaun ba ró Berlin Nakroma, mai husi kastam hamutuk ho emigrasaun, karantina nomós saúde inklui almamaster ka kapitaun portu Dili.
“Husi inspensaun ne’ebé ita halo hodi haree ba dukumentus sira husi ró ne’e rasik, tanba ró ne’e ba no fila fali mai ita tenke haree nia dukumentus sira ne’e, alende servisu ne’ebé ami halo tuir ida-idak nia kna’ar ne’ebé iha, husi ekipa ne’ebé ohin mai ho ró Berlin Nakroma hamutuk tripulantes sanulu resin ne’en (16) inklui sira husi koking ho tekniku na’in rua”, Kapitaun Jerál Portu Dili, Rogeiro Soares, hakotu.
Tuir observasaun jornalista Lafaek News, iha portu Dili nota katat bainhira ró Berlin Nakroma deztaka iha portu Dili, hetan partisipasaun husi Prezidente Administrasaun APORTIL, I.P, Kapitaun Jerál Portu Dili, funsinariu husi APORTIL, I.P, alende populasaun sira ne’ebé mak atu halo viajem ba munisipiu Oe-Cusse inklui Atauru.
Reportajen: Crispin de J. Amaral
