Lautém-(Lafaek News)—Ponte Buihomau ne’ebe lokaliza iha suku Serelau, aldeia Bauihomau ameasa tenke kotu tanba afetadu husi korente mota ne’ebe makaas iha semana hirak liu ba posibilidade monu bainhira udan kontinua tau maka’as.
“Ponte ne’e atu kotu ona tanba korente mota ne’ebe boot tan ne’e ami husu ba parte relevante liu-liu MOP atu toma medida lalais” Dehan, Motorista, Mario da Costa, ba Lafaek News, iha Aldeia Buihomau, Suku Serelau, postu administrativu Lautem, Munisipiu Lautem (10/04/2021).
Nia haktuir, governu la rezolve lalais bele fo impaktu ba komunidade sira tanba maioria komunidade iha aldeia refere assesu ba ponte ne’e hodi halo movimentu ba suku sira seluk no assesu ba kapital munisípiu Lautém.
“Ponte ne’e suku 10 mak assesu ida ne’e, tanba ne’e ha’u reprezenta komunidade hotu ne’ebé iha ne’e hatoo problema ne’e ba iha nasionál liu husi ita boot media sira atu nune’e ita nia governante sira bele rezolve lalais ami nia preokupasaun sira ne’e,” Mario subliña.
Entretantu, tuir dadus populasaun iha periodu tinan 2015, iha aldeia Buihomau suku Serelau, postu administrative Lautém, komunidade hamutuk 1234 mak asesu liu husi ponte Buihomau hodi ba merkadu.
Jornalista : Anselmo Monteiro
Editór : Agapito de Deus
