Lafaek News—Portavoz Polísia Nasionál Timor-Leste (PNTL), Arnaldo Araujo, afirma kazu ró mout iha tasi-laran hetan ona na’in 5, na’in rua ho kondisaun mate nain rua (2) seluk seidauk hatene paradeiru, PNSIK ajenda ona atu buka tuir fukun husi dezastre ne’e.
“Prosesu kazu ró mout PNSIK tau ona ba ajenda atu hatene motivu husi Ró mout ne’e tanba saida? hanesan mina mak menus ka ema mak halo baku fila ka ro todan liu mak mout entaun kona-ba kazu ne’e ita sei hatene husi PNSIK,” Dehan Portavoz PNTL Superintendente Xefe, Arnaldo Araujo ba jornalista iha KOMJER Kaikoli Dili, tersa 18/05/2021.
Arnaldo relata, akontesimentu Ró lokal ida mout iha tasi laran rezulta ema nain hitu mout iha tasi laran, konsege hetan ona ema nain 5 no husi ema nain 5 ne’e, nain 2 mate no ema nain tolu konsege salva vida, maibé ema na’in rua seidauk hatene paradeiru.
“Agora Unidade Polísia Maritima (UPM), ho komunidade Ataru sei buka hela sidadaun Timor oan nain rua ne’ebe too agora seidauk hetan iha tasi laran,” Portavoz PNTL Arnaldo deklara.
Jornalista : Orlando Magno
Editor : Agapito de Deus
