Lafaek News—Polisia Nasionál Timor-Leste (PNTL), ohin kuarta (14/07) hapara derepente atividade negosiu iha pontu entrada Tasi-tolu, tanba kria fali merkadu hodi hamosu ambiente ne’ebé la saudavel.
Negosiante Romana dos Santos Maia, triste tebes tanba kada bazar, sira fa’an sasan no protudu di’ak hela, maibé ohin loron polisia hapara derepente no laiha informasaun ruma ba sira.
” kada loron segunda, kuarta no sesta ami fa’an ami nia sasan di’ak hela, maibé ohin loron sira hapara derepente, entaun ami nia hahan tasak sira ne’ebé atu fa’an ne’e kala estraga de’it ona,” dehan negosiante Romana ba Jornalista Lafaek News, iha Pontu entrada Tasi-tolu Dili, kuarta (14/07/21).
Fatin hanesan PNTL ida ne’ebe (lakohi fó nia identidade) hateten, antes ne’e informasaun iha ona, tanba estadu emerjénsia no serka sanitária ne’e aplika laiha merkadu iha pontu entrada, só iha de’it transasaun, tanba mosu fali merkadu, tan ne’e orientasaun husi estadu no governu katak tenke muda ba merkadu Taibesi no Manleuana.
“Antes ne’e sira mós hatene ona informasaun katak labele fa’an iha ne’e, maibé sira nafatin kria merkadu iha ne’e hodi kria ambiente ne’ebé ladi’ak no hamosu foer nakonu iha estrada, entaun ita prontu orienta sira ba merkadu,” dehan Membru PNTL ne’ebé halo seguransa iha Pontu Entrada Tasi-tolu ba Jornalista Lafaek News hafoin hapara atividade negosiu iha pontu entrada Tasi-tolu.
Membru PNTL ne’e informa tan , ohin loron muda sira ba merkadu, só transasaun de’it mak bele hala’o iha pontu entrada Tasi-Tolu.
“Ohin loron ita muda sira ba merkadu, sira ne’ebé mak iha kliente mak prontu halo transasaun hanesan baibain, sira ne’ebé laiha kliente prontu ba merkadu depois sai fali mai atu ba munisípiu mak ami kontrola fali,” informa .
Enkuantu regras husi governu la loke merkadu iha pontu entrada ne’e, tanba ne’e tenke, diriji sira ba merkadu ne’ebé governu kria, maibé tenke kumpri regras ne’ebé iha, tama livre atu sai tenke swap, iha guia de marsa no kartaun vasinasaun dala rua.
Tuir observasaun Jornalista Lafaek News iha terenu nota, dadaun ne’e iha pontu entrada mamuk ona no laiha atividade negosiu hanesan baibain, hotu-hotu la’o tuir regras governu nian. Neduni negosiante sira husi munisípiu tama mai Dili livre hodi lori sira nia produtu ba merkadu, maibé atu sai husi Dili polisia tenka pasa ravista karta swap, guia de marsa no karta vasinasaun dala rua.
Jornalista : Juvita dos Santos
Asiste Editór : Pedro de Almeida
