Lafaek News— Diretora Programa Nasionál Dezenvolvimentu Suku (PNDS), Claudinha Soares Pinto, hatete, kontrusaun uma ba benefisiariu iha territoriu laran la’os liu husi kompetisaun.
“Planu governu nian ida ne’e ita la’os halo kompetisaun ba ita nia komunidade sira, tanba ida ne’e la’os konkordansia husi ita nia xefe suku sira maka konsidera no propoin katak nain hira ne’ebé familia kbi’it la’ek maka ida ne’e, maibé liuhusi prosesu ida deside sira nain tolu de’it no nain tolu ne’ebé maka merese duni,” Diretora PNDS, Claudinha Soares Pinto, ba lafaek news, foin lalais ne’e.
Diretora esplika, bainhira nivel suku kompostu husi delegadu no delegada sira ho xefe aldeia no xefe suku liu husi enkontru konsidera lista ema nain 10 maka kbi’it la’ek loos no prseiza duni hetan uma, maibé bazeia ba rekejitus.
“Ita hotu tenke hatene katak uma ne’e ba ema nain tolu de’it, tanba manual hatete katak ema hotu-hotu iha direitu hanesan para atu hetan uma ne’e mais tenke tuir rekejitus no mós kriteira ne’ebé iha,” tenik diretora.
Nia fundamenta, ekipa verifikasaun husi PNDS ba halo verfika iha terrenu hafoin deside katak merese duni ema nain tolu maka hetan uma, ne’e liu husi prosesu ida.
“Prosesu ne’e justu, ita lakohi atu xefe aldeia hili de’it nia familia, ou aat liu maka partidu hanesan ho nia, ita evita buat sira hanesan ne’e, tanba ne’e maka ita tenke liu husi regra iha katak ne’e justu ba ema hotu-hotu, loke dalan ba ema hotu para hetan uma ida ne’e maibé ita liu husi prosesu no rekejitus ne’ebé hatuur ona iha mata dalan,” nia refirma.
Entertantu antes hala’o programa governu nian ida ne’e hodi hatene benefisiariu ne’ebé elijivel duni atu hetan uma, entaun parte PNDS liu husi konsultasaun lubuk ida ho liña ministeriu sira MSSI, SEPS, Veteranu no mós sira seluk tan.
“Ami husu kona-ba lista ema kbi’it la’ek, karik iha dadus ruma maibé ate agora ministériu hotu hotu sedauk apresenta, siginifika ita seidauk iha ida ema kbi’it la’ek, entaun ami hala’o servisu rua, rekoilla dadus kbi’it la’ek ho programa governu nian,” nia hakotu.
Jornalista : Pedro de Almeida
Editora : Nelya Barros
