Lafaek News— Diretora Programa Nasionál Dezenvolvimentu Suku (PNDS), Claudinha Soares Pinto, informa, uma ba kbi’it la’ek tuir kriteira ka medida ne’ebé tuir mata-dalan.
“Medida husi uma ne’e rasi iha tipu rua, primeiru maka 37 metru kuadradu, iha kuartu rua sala vizita ho han fatin hamutuk de’it, paredi tomak hotu ita reboka hotu, iha leten maka la tau plafond, taka hotu kalen full tembok hotu,” dehan Diretora PNDS, Claudinha Soares Pinto, ba Lafaek News, foin lalais ne’e.
Diretora esplika tan, medida ida fali maka 48 metru kuadradu kuartu tolu, inklui medida odamatan ne’e tuir padraun, tanba halo konsultasaun ho maluk defisiénsia sira katak iha area rural difisente sira hotu sei tur iha kadeira roda.
Husi dezeñu ne’e rasik hariis fatin ho dapur halo ketak, tanba iha area rural maioria uza ai-sunu, maibé parte balun mós kestiona katak nusa la halo hamutuk de’it.
“Ita hatene katak uma halo iha area rural perigu tebes kuandu halo hamutuk maka akontese buat ruma, orsida hatete katak governu halo buat ne’e latetu, entaun ami hanoin katak dapur ho hariis fatin halo iha liur, tanba ita hare’e mós ba ijene,” hahate nia.
Nune’e, kona-ba bee no lixu fatin iha hotu no benefisiáriu ne’ebé la asesu ba eletrisidade governu tau osan hodi sosa solar panel nune’e bele asesu naroman.
PNDS nia sietema komunidade sira mak sei jere atvidades ne’e tomak, maibé orsamentu tama ba iha konta-bankaria PNDS suku nian tuir mai ekipa jestaun suku jere, sira maka sei hahú prosesu aprovizionamentu no loke kuotasaun ba kompñia lokal ne’ebé eziste iha suku laran hodi kompete nune’e bele sosa material konstrusaun.
“Kotasaun tolu material fabrikanu, material lokal no mós espesífiku, tuir mai komunidade maka ba kontratu ho ita nia badaen sira atu halo uma, ami fasilita maibé servisu tomak komunidade sira maka halo, benefisiáriu mós sei halo kontribuisaun mós,” tuir diretora,
Diretora PNDS mós fundamenta, bainhira uma ne’e remata entrega ba benefisiarius sira sei presta deklarasaun katak tenke kuida obra ne’ebé maka governu rai hela, maibé orsamentu ba manutensaun laiha ne’e responsável benefisiáriu sira nian.
Jornalista : Pedro de Almeida
Editora : Nelya Barros
