Lafaek News–Vise Ministru Interior Antonio Armindo informa, simu orden servisu husi Primeiru Ministru Taur Matan Ruak, hodi halo sosializasaun ba populasaun sira ne’ebé hela besik iha area fronteira hodi servisu hamutuk autoridade seguransa kombate movimentasaun ilegal.
“Objetivu husi ami nia vizita ida nee atu koalia liu konaba seguransa iha fronteira, ida nee hetan orientasaun husi primeiru ministru no ministru interior Taur Matan Ruak, no nia preokupa makas parte liña fronteira tan nee nia orienta hau mai halo sosializasaun ba inan aman ne’ebé hela besik fronteira,”Antonio Armindo liu husi nia diskursu ba jornalista sura iha Tunubibi Bobonaru, tersa (03/08/2021)
VMI Antonio Armindo relata, ema hotu seguransa iha fronteira ne’e la’os fasil, atu halo seguransa nasaun ida la’os de’it instituisaun seguransa mesak nia responsabilidade, maibé ida ne’e responsavel ema hotu nian.
Ho ida nee, Governante sira tenke tun diretamente iha munisípiu too area rurais ne’ebé besik fronteira hodi fo informasaun ba komuindade, tanba moras ne’ebé mundu tomak afeta inklui Timor Leste hanesan moras COVID-19 nee perigozu tebes.
“Ha’u husu ba autoridade lokal no komunidade inklui juventude sira iha suku Tapo Memo liu-liu aldeia tunubibi atu kontribui ba instituisaun seguransa nian hodi haree lisuk ema ne’ebé gosta liu dalan ilegal iha fronteira,” Nia esplika
Nia reforsa, Karik komunidade sira hetan ema oin foun iha suku no bairo ka aldeia, informa kedas ba autoridade lokal suku no parte seguransa nian, maibé labele kaer sira nia isin dalaruma sira lori hela moras COVID-19.
Xefe suku Tapo Memu Joaquim Batista dos Santos hatete, sira sente agradese ba ekipa neebe halo ona sosializasaun ba aldeia Tunubili atu kontribui ba servisu seguransa nian iha fronteira.
“Ami nafatin organiza malu atu simu vasina no prontu atu servisu hamutuk ho parte seguransa hodi proteje fronteira nunee ita bele kombate COVID-19 iha rai laran,” Joaquim deklara.
Joaquim realsa, populasaun neebe partosipa iha sosializasaun nee aldeia Tunubibi deit tanba aldeia ida nee mak besok liu iha fronteira tan nee mak husi ministerial liu husi ministeriu Interior mai halo sosializasaun ba komunidade sira iha aldeia nee.
Entretantu Suku Tapo Memo kompostu husi aldeia neen mak hanesan, aldeia Tunubibi, Pipgalak 1, Pipgalak 2, Lepgen, Huluwati, no mos aldeia Manu Aman, total uma kain hamutuk 1372 no total populasaun hamutuk 5893, moris ho agrikultura.
Jornalista : Orlando Magno
Editór : Agapito de Deus
