Lafaek News— Prezidente Komisaun Nasionál Eleisaun (CNE sigla Portugues), Alcino de Aroújo Barris esplika, preparasaun ba resensiamentu eleitoral no votasaun ba Timor-oan iha diápora la’o hela.
Alcino Araújo Barris, hatoo asuntu ne’e hafoin hasoru malu ho Prezidente Repúblika Francisco Guterres Lú Olo, tersa (03/08/2021), CNE husu audensia ho Prezidente Repúblika atu marka prezensa iha lansamentu ba rezultadu peskiza komisaun nasionál eleisaun ba aktus eleitoral ne’ebé tuir programa sei lansa iha loron 12 Agostu.
“Preparasaun lao hela no CNE konvida ona autoridade MNEC husi parte dirigente ba asuntus konsolares, esplika ona oinsa ita atu tama iha ema nia rain hodi oinsa halo atualizasaun ba baze de dadus ou resensiamentu eleitoral no sira atu vota,” dehan Alcino iha Palasiu Prezidente Aitarak laran Dil.
Alende ne’e, nia esplika da-daun ne’e situasaun mundial enfrenta hela pandemia COVID-19, no fatin barak aplika hela sistema konfinamentu no serka sanitaria, tanba bainhira ba sei kumprimenta lai kuarantena hafoin halo servisu, ba asuntu ida ne’e sei hein resposta husi MNEC.
“Fatin ne’ebé ita atu ba mak hanesan Austrália, Korea do Sul, Inglaterra, Irlándia do Norte no Portugal, fatin sira ne’e ita tenke ba, Ministru Negósiu Estranjeiru sei fahe informasaun kona-ba ida ne’e,’’ nia dehan.
Prezidente Komisaun Nasionál Eleisaun, Alcino de Araújo Barris aprezenta tempu ba eleisaun nia sei hakontese iha fulan Marsu ne’ebé prevee ona tuir konstituisaun RDTL.
Estajiadu : Simão João Mira Fraga
Editór : Agapito de Deus
