Lafaek News–Estrada diresaun Balibo Vila liga suku Kowa kondisaun atu susar ba komunidade sira lori produtu lokal asesu iha merkadu.
Bainhira tranposte liu iha estrada Diresaun husi Balibo Vila ba Suku Kowa kondisaun la di’ak no provoka rai-rahun sa’e maka’as tanba kompañia balu abandona projetu taka estrada kuak too agora la kontinua, suku ne’e iha mor problema bee mos hasusar tebes populasaun sira atu asesu.
Reprezentante Xefe suku Kowa Cipriano Noronha hatete, difikuldade neebe kumunidade Kowa hasoru laos deit mak estrada maibe sira mos iha preokupasaun konaba bee moos tanba atu asesu bee moos komunidade sira tenke lao mais ou menus too kilometru 3 mak foin bele asesu bee moos.
“Kona-ba bee moos ne’e mos importante tebes ba ita nia komunidade sira tanba sira lao dook mak foin asesu bee moos no mos presida hadia estrada nunee komunidade sira bele asesu ba merkadu no mos parte seguransa sira bele halo pateolla ho diak bainhira estrada nee diak inklui mos ba inan isin rua sira atu asesu ba sentru saude,” dehan Cipriano ba jornalista iha Railuli Bobonaru, segunda 02/08/2021.
Nia haktuir, iha nia parte konsidera estrada mos importante ba komunidade sira atu asesu ba merkadoria no ba seguransa sira iha fronteira atu halo patrollamentu.
- “Importante liu hadia estrada ba seguransa sira iha fronteira tanba atu halo seguransa diak presiza estrada di’ak nune’e bele halo patroilla mos ho di’ak, maibé ami presiza mos ba seguransa sira ne’ebé iha ami nia lostu ida ne’e sente bee menus tebes,” nia esplika.
Cipriano informa, foin lalais husi kompañia balu taka de’it estrada kuak, maibé depois husik hela, bainhira tranporte movimentu provoka rai rahun as hodi fó impaktu mos ba komunidade sira nia saúde liu-liu labarik kiik sira.
Nia deklara, komunidade suku Kowa Aldeia liman balu asesu ona bee mos, maibé balun seidauk asesu bee mos inklui presiza halo reabilitasaun ba bee mos ne’ebé ejiste ona iha aldeia balu iha suku Kowa.
“Iha aldeia railuli ho aldeia mane haat maioria asesu bee mos maibé presiza halo rehabilitasaun, iha aldeia lalis seidauk asesu bee moos, iha aldeia mane haat sira qsesu ona, maibé presiza halo reabilitasaun tanba dezde ukun aan mak ita halo entaun agora komesa aat ona no besi sira mos komesa tohar ona tan ne’e ita presiza halo reabilitasaun,” Cipriano hakotu
Jornalista : Orlando Magno
Editór : Agapito de Deus
