Lafaek News (Bobonaru)–Indepedénai Timor Leste tinan 20 ona, maibé suku Kova kompostu husi aldeia 5 la sente eletrisidade nia nabilan, kalan sunu lilin ho lampu tradisionál hodi fasilita labarik sira estuda.
Komunidade aldeia Railuli suku Kova Postu administrativu Balibo munisípiu Bobonaru Saturnino Barreto informa, iha nia parte sente triste tanba Timor-Leste ukun aan tinan barak ona, maibé too agora sira seidauk asesu ba eletrisidade atu sente naroman hanesan suku sira seluk.
“Ami sente la di’ak bainhira eleteisidade seidauk tama iha ami nia suku tanba ita nia rai ukun aan tinan barak ona, maibé tanba sa mak too agora governu seidauk dada liña eleteisidade mai ami nia suku?, ho ida ne’e ha’u sente triste tebes la hatene bainhira loos mak ita nia nai uluk sira atu loke matan ba nia povu,” dehan saturnino ba jornalista iha Railuli Bobonaru, segunda 02/08/2021.
Saturnino rekomenda, nia husu ba governu atu tau prioridade ba povu nia preukupasaun tanba husi povu mak governu iha, se laiha povu entaun governu mos laiha, tan ne’e nia ejize ba governu iha tempu badak atu dada liña eletrisidade ba sira nia suku no aldeia.
Iha fatin hanesan, reprezenta xefe suku Kova Cipriano Noronha realasa, komunidade suku Kova maioria seidauk asesu ba eletrisidade atu sente naroman iha ukun aan ida ne’e.
“Komunidade sira iha suku Kova nee foin kanua rua uma kain 100 mak asesu eleteisidade maibe seluk husi nee seidauk asesu ba liña eleteisidade iha suku Kova mak hanesan aldeia futatas, Bawai, Lalis railuli no aldeia mane haat,” Cipriano deklara.
Nia afirma, sira hatama ona proposta konaba eletrisidade no hatoo ona sira nia preokupasaun ba ministeriu relevante, nune’e mos husi parte relebante responde ona komunidade nia preokuoasaun katak fulan Novembru tinan ne’e eletrisidade lakan ona iha suku Kowa inklui aldeia sira hotu.
“Ita iha ona informa ona ba Ministériu Obras Públik, sira responde ona katak fulan agustu tinan nee atu dada ona liña eleteisidade iha suku Kova no parte ministériu Obras públika promete ba komunidade katak, fulan novembru eletrisidade iha suku Kova sei naroman no nabilan,” nia hatutan
Entretantu tuir dadus ne’ebé Lafaek News asesu total populasaun iha suku kova, uma kain 596 no populasaun hamutuk 2548.
Jornalista : Orlando Magno
Editór : Agapito de Deus
