Lafaeknews-Segunda (12/04/2021), Primeiru-Ministru (PM), Taur Matan Ruak enkora nafatin ekipa médiku kontinua servisu, lalika tauk presaun hosi Kay Rala Xanana Gusmão iha sala izolamentu Vera Cruz.
Relasiona ho pasiente pozitivu Covid-19 ne’ebé hakotu iis hodi kalan, ne’ebé ohin dader, eis Prezidente Repúblika, Kay Rala Xanana Gusmão ba hala’o impedementu, hodi Governu labele lori ba haloot tuir protokolu saúde nian iha semitériu própriu Covid-19 nian iha Metinaru.
Ho situasaun ida ne’e, daudaun hamosu ema nia sentimentu negativu ba profisionál saúde sira, ema balun hahú reazen tuda ambulánsia sira no la fiar médiku sira. Ba situasaun ida ne’e, Xefe Governu enkoraja médiku sira no ekipa liña frente hotu atu kontinua firme serbisu, keta triste no lakon esperansa, tanba Governu no Estadu iha hela ita-boot sira nia sorin.
“Ha’u lamenta ho situasaun ohin iha Vera Cruz, devia ser ida ne’e la podia akontese. Ha’u rona, ema balun komesa tuda ambulánsia no ita nia ekipa liña frente sira, atitude ne’e sei la ajuda atu kombate moras ne’e iha ita- nia rain,” dehan PM Taur Matan Ruak, liu husi komunikadu ne’ebé lafaeknews.com asesu, iha loron segunda, (12/04/2021).
Iha komunkadu inprensa ne’e relata, Primeiru-Ministru, kontinua apoiu ekipa saude no sala situasaun tanba governu sempre iha kotuk hodi apoiu.
PM Enkoraja Ekipa Médiku Kontinua Serbisu, Lalika Tauk Presaun Hosi Xanana “Hanesan PM, hakarak manifesta ha’u-nia solidariedade no apoiu tomak ba profisionál saúde no ekipa sira hotu iha liña frente iha Sala Situasaun, korajen no kontinua serbisu, ita-boot sira sei la mesak, Governu no Estadu tomak iha ita-boot sira nia kotuk,” informaTaur .
Jornalista : Pedro de Almeida
Editór : Floriano Soares
