Lafaeknews-Diretór Asia Justice and Rights (AJAR), José Luís Oliveira, konsidera governu ignora tiha povu nia preokupasaun ba prevensaun Surtu Covid-19 iha Timor Leste, tanba nee husu tulun ba líder Kay Rala Xanana Gusmão, hodi ajuda povu atu fó hanoin ba governu.
Bainhira povu enfrenta tratamentu neebé ladún justu ka ladún transparente mak sira ba husu ajuda fali ba líder karismátiku Kay Rala Xanana Gusmão, dehan José Luis Oliveira ba LafaekNews iha nia knaar fatin, Faról, Segunda, (12/04/2021).
Nia dehan, tuir lolos situasaun hanesan nee ppovu levanta ba órgaun kompetente sira, liuliu ba Governu no Parlamentu Nasionál, maibé durante nee órgaun ezekutivu sira hanesan tilun diuk no matan delek ba problema povu nian.
Tanba ita haree buat balu hanesan servisu halo atendimentu pandémia Covid-19 ne’e hanesan lao ladún konsistente. Ita hanesan laiha tiha biban atu kestiona buat sira ne’e, ita simu deit órden hosi ne’ebá no dala ruma tratamentu lao la loos ita atu defende ita nian interese laiha.
Tuir nia, dehan Armindo Borjes mate tanba Covid-19, tanba konkluzaun hosi Óspital dehan pozitivu Covid, maibé ida ne’e ladún konvensidu komunidade sira tanba vítima nee antes ne’e moras buat seluk, derepenti ema ne’e mate dehan Covid-19.
“Se ita dehan nia Covid-19 loloos ne’e família matebian sira ne’e sai klaster ida atu hetan izolamentu, mais faktu família sira husik livre hela, entaun teoria neebé mak ho dehan distánsiamentu sosiál iha poténsia atu hetan Covid-19 ne’e labale tiha,” nia afirma.
Nia hatete, bainhira tratamentu sira ne’e laiha konsisténsia mak sakrifika ema balun laiha fatin atu kestiona Sentru Integradu Jestaun Krize (SIJK) ne’e sai hanesan abuzu poder iha situasaun ida agora ne’e, tanba haree buat barak ne’ebé lao ema susar atu komprende nia rasiosismu ideolojika, ne’e mak hodi ema kestiona.
Ho ida ne’e líder polítiku sira nonok hela, haree buat balu neebé mak lao la loos. Durante ne’e sidadaun barak mak lamenta ho situasaun ida ne’e, ema neebé mak moras Covid-19 tanba foti maibé deit sira nia lian laiha.
Jornalista : Rita Moniz
Asisten Editór : Pedro de Almeida
