Lafaeknews-Reprezenta familia matebian, Jenovita Barros de Jesus konsidera Lidér Xanana Gusmão nia prezensa iha sala Izolamentu Kontinua hein to’o kalan hodi foti mate isin Armindo Borges.
Família Matebian Jenovita Barros de Jesus
“Ami sente avo Xanana haree ami hanesan povu tanba ne’e mak nia mai husi dader to’o kalan mós nia nafatin iha ne’e, tanba buka lia loos, maske la’ós família, maibé Avo Nana haree nia povu,” dehan Matebian nia Bin Jenovita ba jornalista iha fatin izolamentu oin Vera Cruz Dili, Segunda (12/04/2021).
Jenovita dehan, Avo Nana lakon povu ida hanesan ne’e, aban bai-rua vota sei hanesan uluk ka lae? tanba ne’e mak avo mos kontribui ba nia povu ida ne’e.
“Ohin loron ami hein iha ne’e husi dader to’o mai kalan ne’e, governante no parte Sentru Integradu Jestaun Krize (SIJK), mos laiha ida mak mai tau matan no ko’alia ho ami família sira so ke avo Xanana de’it mak hamutuk ho ami iha husi dader to’o kalan,” nia deklara
Jenovita konta, iha parte dader nia rasik atu lori roupa ba troka matebian, maibé parte saúde la hatan tanba Corona-19 iha laran, maibé matebian nia bin ne’e konsidera Corona laiha.
Iha nia parte rejeita informasaun ohin dehan sira nia família nain rua pozitivu COVID-19 ne’e laloos tanba sira isin di’ak hela, maske halo ona teste swab, maibe Corona laiha.
“Alin mane ne’e moras strok ho nia rins tanba de’it horikalan, ran sai husi inus no muta ne’e, mak ami lori nia ba Hospital Nasionál Guidu Valadares (HNGV), atu halo tratamentu, maibé ikus sira dehan ha’u nia alin pozitivu Covid-19,” Jenovita hakotu.
Nune’e, família matebian ho lidér Kay Rala Xanana Gusmão desde dader to’o kalan kontinua nafatin hein mate isin Armindo Borges iha sala izolamentu Vera Cruz.
Iha tuku 8:30 kalan OTL ona, maibé Xanana kontinua hein mate isin no akompaña hosi família matebian sira.
Nune’e, kalan ne’e mós Padre Angelo Salsinha organiza reza ba matebian iha sala Izolamentu Vera Crus Díli ho família matebian no Xanana Gusmão.
