Lafaek News-PLAN Internasional liu husi Ministériu Saúde distribui material ijiéne kits pakote 680  ba vítima inséndiu (naboran) iha merkadu Komoro, hanesan pepsodent, Eskova Nehan, Sabaun, Sampoo, Rinsu, Laurier, Hand Sanitizer no Maskra. 

Ministra Saúde Odete Maria Freitas Belo, hatete, Ministériu Saúde la’os ba fahe háhan, maibé importante vítima sira nia kondisaun, karik sira iha kondisaun di’ak hafoin bele hala’o sira nia servisu.

‘’Ita hotu hatene iha situasaun ida hanesan ne’e ita hakarak hadia lalais ita nia kondisaun atu bele moris fila fali hanesan bainhira ita nia sasan sei iha, ita hakarak atu asesu lalais ba uma, bee moos, hahan, no ba buat hotu neebé mak ita hakarak, maibe atu halo ida nee tenki haree uluk ba ita nia saúde lai, se ita boot sira nia kondisaun diak mak bele kaer servisu, dehan Odete Maria Freitas Belo, ba jornalista sira iha Merkadu Komoro, sabadu (31/07/2021)

Nia hatutan, inan aman sira tenki tau atensaun ba kiik oan sira, liu-liu ba bebe, no mós ba inan isin rua, ferik ho katuas sira, bainhira sira moras ida ne’e sai mós hanesan problema ida ba iha uma kain ida, se bele karik tenki kuidadu an, kuidadu mós ferik ho katuas sira. 

Iha fatin hanesan, Xefe Aldeia 03, Zeferino Bras, dehan,  Pakote ne’ebé apoiu husi Plan Internasionál ba iha Ministeriu Saúde hodi distribui ba vitima sira hamutuk pakote 680.

 Pakote ne’e sei distribui ba uma kain 168, nune’e kada uma kain ida sei hetan pakote ida, enkuantu total dadus uma kain ba inséndiu ne’e hamutuk 168, ho total populasaun iha Aldeia 03 hamutuk 1667.

Jornalista :Sandi Belo

Editór : Agapito de Deus