Lafaek News--Abitante merkadu Komoro, Eva Barros da Silva, ne’ebé ho kondisaun grávida (isin rua) triste ho mata-wen tanba lakon osan $.575 ho sasán kioske nian inklui nesesidade uma laran hetan estragus total iha akontesimentu inséndiu merkadu Komoro.
“Ahi lakan boot ona ami susar atu salva sasan uma laran, salva maka ami nia an no oan sira de’it, osan lima sen ida mos ami la lori sai, so ropa ida ami hatais ne’e de’it. Hau nia osan hamutuk $ 575.00, maibé sasán kisoke nian ho uma laran tomak nunka lori sai ida, ahi han hotu,” vítima inséndiu Eva Baros da Silva ba lafaek news iha eis merkadu Komoro, aldeia 03, suku Fatuhada foin lalais ne’e.
Eva haktuir, iha momentu akontese ahi naboran iha tuku tolu madrugada ho nia oan nain tolu mesak iha uma, nia kaben ba servisu hela iha Baukau, nune’e inséndiu ne’e mosu laiha ema mane ida atu bele salva lalais sasan tomak iha uma laran inklui kioske.
Iha fatin hanesan vítima Joana Moreira, hanesan estudante iha eskola sekundaria 10 de dezembro besik ona atu remata estudu, maibe akontese insendiu iha loron kinta (29/07), oras tuku 3:00 madruga halo ema hotu trauma no lasalva dokumentus eskola no farda tanba ahi lakan makas, salva deit aan no ropa ne’ebe uza iha isin lolon.
“Hau nia dokumentus eskola nian no farda ahi han mos hotu, besik atu remata ona estudu maka ahi han hotu ona,” dehan vítima Joana Moreira.
Entretantu total uma kain ba inséndiu iha eis merkadu Komoro ne’e hamutuk 168, inan isin rua hamutuk 15 no labarik idade 5 ba kraik 300 resin, oras ne’e da-daun vítima sira evakua ona tenda ne’ebé parten kompotente prepara ona besik fatin akontesimentu.
Jornalista : Domingas Viana
Editór : Agapito de Deus
