Lafaek News–Loron 31 Jullu 2021 Ministériu Saúde deteta kazu pozitivu Covid-19 foun 154, as liu iha munisípiu Ermera rejista 114, Dili 34, Baukau 2, Kovalima 2, no Likisa 2, nune’e kazu rekuperadu hamutuk 41, total kazu ativu 983.
Koordenadór forsas tarefas ba prevensaun no mitigasaun surtu covid-19 iha Timor Leste, Rui Maria de Araújo, relata Kazu detetatu foun iha loron 31 Jullu 2021: 154 (iha Dili 34, Ermera 114, munisipiu seluk hamutuk 6), husi total kazu detetadu foun nee: mane 77, feto 77, kazu detetadu foun hirak nee ho idade 12:7, ho idade entre 12-59 nain 143 (93,0%), ho idade 60:4, no husi total kazu detetadu foun nee 64 kazus ka 41,6% maka sintomátiku (hatudu sintomas).
”Kazu rekuperadu neebé ralata ohin hamutuk: 41, kazu ativu ohin hamutuk: 983, no total kazu konfirmadu kumulativu iha 31 de Jullu 2021 (sura husi 21 Marsu 2020): 10.898,” esplika Rui Maria de Araujo liu husi komunikadu imprensa, sábadu (31/07/2021)
Governante ne’e informa, husi insidénsia Covid-19 iha Timor-Leste durante loron 7 ikus maka 6,1/100 mil abitantes, enkuantu ba de’it Munisipiu Ermera 38,9/100 mil abitantes, ohin, insidénsia iha Munisipiu Dili tuun ba 4,9/100 mil abitantes, tuir kedas ho munisipiu Viqueque ho valor 5,2/100 mil abitantes, ida nee hatudu katak Insidénsia Munisipiu Ermera nian maka aas-liu, munisipiu tolu Ermera, Dili, Vikeke tama ona iha risku boot liu atu populasaun hetan da’et, no hadaet tutan virus SARS-CoV-2, iha komunidade nia leet.
Rui Maria de Araújo hatutan, númeru kazu pozitivu hahú aumenta makaas iha munisipiu Ermera, iha loron 24 Jullu 2021, bainhira relata 36 kazus iha loron ida de’it, nunee kipa saúde halo rastreiu kontaktu (contact tracing) hahú iha loron 26 Jullu, deteta kazu pozitivu 18 neebé relata iha loron 27 Jullu, 123 iha loron 28 Jullu, 112 iha loron 29 Jullu, 13 iha 30 Jullu, no ohin relata kazu pozitivu hamutuk 114.
Rui hatutan, iha loron 31 Jullu 2021, izolamentu Vera Kruz halo tratamentu ba kazu detetadu nain 15, Iha área obstetrisia nain 6, iha medisina interna nain 5, iha sirurjia nain 3, pediatria 1, sira nain 6 iha obstetrisia, kategoria leve (mild) hotu, husi sira nain 5 iha medisina interna, 1 kategoria moderadu, 4 leve (mild), sira nain 3 iha sirúrjia, kategoria leve (mild) hotu, no ida iha pediatria, kategoria leve.
Jornalista : Sandi Belo
Editór : Agapito de Deus
