Lafaek News—Vitima insediu iha eis merkadu Komoro aldeia 03, suku Fatuhada, postu aministrativu Dom-Aleixo Munisípiu Dili, iha inan isin rua hamutuk 15, Labarik husi idade 5 ba kraik iha 300 resin, tan ne’e xefe aldeia husu ministériu saúde presija distribui Muskitéiru.
Tuir Xefe Aldeia 03 Zeferino Bras, husu ba Ministériu Saúde presija distribui mós Mósquiteiro ba vitima insendiu iha eis merkadu Comoro atu bele garante saúde labarik no inan isin rua sira hodi hadook an husi moras denge.
“Labarik ki’ik oan husi idade 5 mai kraik iha 300 resin, inan isin rua hamutuk 15, tanba ne’e ami presiza ajuda husi Ministériu Saúde liu-liu Mósquiteiro , atu oferese ba iha uma kain ida tenki hetan 3 ou 4, atu nune’e sira la bele kona moras dengue no moras sira seluk,” dehan Xefe Aldeia Zeferino Bras, ba jornalista sira iha Merkadu Komoro, sabadu (31/07/2021).
Nia hatutan, Ministériu Saúde fó Mósquiteiro ba uma kain 1 hetan ida de’it ne’e la di’ak, tanba sira mós iha oan, se sira hetan Mosquiteiro 1 deit sira nia oan ho sira seluk la bele asesu.
“Ida ne’e mak ha’u relata ba Ministériu Saúde bele ajuda, no mós ministerial sira seluk bele tulun mós kona-ba miskiteiru ne’e,” nia sujere.
Hatan ba preokupasaun ne’e, Ministra Saúde, Odete Maria Freitas Belo, hatete, Mósquiteiro iha hela, importante mak dadus ne’e mai para bele halo diskusaun nune’e bele halo distribuisaun ba vitima sira.
“Mosquiteiro iha, ami hanoin ami distribui ona horiseik no ohin xefe Aldeia husu atu bele hetan tan adisional ruma, tanba ba uma kain ita distribui, maibé ita mós seidauk hatene iha uma kain ida ne’e iha ema nain hira, tanba iha Timor iha uma kain ida ne’e mais de uma kain ida ou rua, entaun ida ne’e mak tenke hare’e fila fali,” dehan Ministra.
Observasaun lafaeknews iha terrenu nota, vitima insediu evakua hotu ba iha tenda ne’ebé mak Governu prepara maka iha Pre-eskolar Aldeia 03 tenda hatmutuk 15, kada lona ida iha uma kain 2 mak toba hamutuk, maibé konaba nessesidade bazika vitima sira hetan ona apoiu husi governu no NGO balun hodi konsumu loron-loron.
Jornalista : Sandi Belo
Asisten Editór : Pedro de Almeida
