Lafaek News—Pineira rai-henek la’os servisu ida ne’ebé mamar hanesan raut ailele nia kabas-rahun, maibé tenke ho iis nakonu no kulit toos hodi see ba loron manas iha mota laran ne’ebé laiha aihun ida.
Maske loron manas Pedro nunka hakiduk, kosar metan sulin habokon isin lolon tomak sunu vontade atu servisu liután ho prinsípiu ida hakerek nanis iha fuan katak aman pineira rai-henek, maibé oan tenke sai matenek.
Pedro Alves Lobato ho idadade 38, husi munisipio Baukau, posto Administrativo Vemasse, aldeia Caicua, esatutu kaben nain iha oan nain 3, nain rua sei kiik, no oan dahuluk komesa estuda iha eskola báziku filial Bebonuk, iha tinan rua liu ba kotuk Pedro buka servisu hanesan ajuda badaen halo uma no buka fase ema nia ropa, maibé buka la hetan, ikus mai iha 2021, nia deside pineira rai-henek hanesan patraun ba an rasik, sorte nakonu loron ida hetan netik dolar 20, maibé sorte mamuk dolar ida teb-tebes mos la hetan, tanba ema barak tebes mak pineira rai-henek iha mota Komoro husi ponte CPLP too iha Beduku.
Pedro la hatene hakerek, maibé nia iha vizaun moris katak aman pineira rai-henek, oan mos labele tuir dalan ne’e, aman la matenek, maibé oan tenke matenek hodi transforma nasaun kiik no lulik ida ne’e sai nasaun ne’ebé nabilan brilante hanesan rai sira seluk iha mundu ne’e.
Kada loron rendimentu husi rai-henek Pedro nian mínimu loos, maibé pedro ho oin midar ba nia maluk sira iha mota laran kontinua servisu ho haksolok katak ohin ema la sosa, karik aban ema sei sosa, tanba loron ohin la hanesan aban, sorte la’os mai loro-loron, maibé sorte mai loron ida dala ida.
“Ha’u sente kontenti tebes tanba tempu bai loron ha’u tenki buka osan husi pinera rai henek hodi hetan osan no sustenta ha’u nia família ho selu oan nia eskola no sosa roupa ba oan sira uja ha’u agradese tebes ha’u bele sustenta ha’u nia família liu husi servisu ki’ik sira hanesan ne’e,”dehan Pedro Alves Lobato ba Lafaek News iha Mota Komoro foin lalais.
Bainhira lafaek news dada lia ho Pedro, hateten servisu suru rai-henek ne’e todan ba nia atu halo, maibé laiha buat seluk nia atu halo no nia tenki suru duni rai-henek hodi sustenta nia família ho selu nia oan nia eskola.
“Loron ida ha’u hetan osan husi servisu suru rai henek ho osan $ 20 dollar karik iha tempu ne’ebé mak ema kompanha sira halo ponte ami hetan rendimentu ne’ebé mak diak dalaruma ami bele hetan loron ida to’o $ 70 dollar maibé tempu de’it mak ami bele hetan hanesan ne’e, se lae dalaruma ami hetan la to hanesan ne’e ida osan sira ne’ebé mak ha’u hetan husi suru rai henek ne’e hodi sustenta ha’u nia família ho selu oan sira nia eskola,” katak Pedro.
Ikus husi dada lia ne’e, Pedro dehan tan, pineira rai-henek mos servisu ida ne’ebé planeadu husi na’i Maromak, no servisu duni ita Timor, duke ba servisu iha ema rain, osan boot maibé lakon dignidade, balun tenke toba iha ema nia uma tatis id aba tatis seluk, maibé ita nia rain buat hotu iha maibé presiza liu badinas atu servisu, labele hein de’it governu.
“Governu la’os iha oan ida de’it, governu iha oan barak, se oan barak tenke tau matan hotu, entaun ita tenke servisu hodi han, governu nia servisu mak halo rai ne’e hakmatek, se ita hotu hein de’it governu bainhira mak ita atu moris,” Pedro hakotu.
Estajiada : Adolfina Soares
Editor : Agapito de Deus
