Lafaek news- Staff tékniku produsaun plantas Ministeriu Agrikultura no Péska, Juanico Correa hatete, tuir dadus asesmentu 2020 no 2021 Ministériu nian hatudu katak peste foun ne’ebé ho naran Lakataru makerek afeta tebes ba batar iha munisípiu, Lospalos, Baucau, Viqueque, Manatutu, Ainaru, Manufahi no Suai.
“Hare ba peste enjerál iha agrikultura Timor-Leste ne’e pesti barak maibé agora dadaun pesti ne’ebé mak afetadu makaas ba iha ortikultura liuliu batak iha kuaze munisípiu mak pesti foun ho naran pesti Lakataru makerek,” dehan Staff departamentu tékniku produsaun plantas Ministeriu Agrikultura no Péska, Juanico Correa iha nia kna’ar fatin komoro foin lalais ne’e.
Nia hatutun, Liu husi dadus asesmentu 2020 nian hatudu katak pesti lakataru ataka ba ai-horis liuliu batar grave liu iha munisípiu Lospalos, Baucau, Viqueque, Manatutu, Ainaro Manufahi no Suai.
“Tama fali ba tinan 2021, ami halo tan asesmentu dadus hatudu kuaze munisípiu sira ne’e grave hotu” tenik nia
Juanico haktuir, Hare fali ba pesti sira seluk tan mak agora dadaun ataka no iha Tinan hirak liu ba mak pesti Karakol ataka ai-horis ba hare iha Maliana, Suai no Viqueque.
“No agora tama fali ba 2021 mós komunidade husi munisípiu keixa katak pesti Lakataru no Karakol dadaun ne’e ataka hela sira nia ai-horis liuliu batar no haree,” dehan nia
Dadaun ne’e Departamentu produsaun plantas refere kopera ho ajénsia balun husi Market Development Facility (MDF) no agora dadaun sira halo hela planu no komesa fulan oin sei halo sensibilizasaun no kapasitasaun ba estajionista sira.
“Liuliu estensionisfa husi MAP ne’e agora destaka ona iha suku ida-idak liuliu fó koñesementu ba pesti lakataru no no fó formasaun oinsa atu halo atuasaun ba pesti refere,” konklui nia
Jornalista : Felisberto F. da Costa
Editór : Acacio Pinto
