Lafaek news-Ekipa Servisu Covalima Vitoria ho Domin-20, Husu ba Governu liuhusi Ministériu Kordenadór Asuntu Ekonomiku(MKAE) ho Autoriedade Inspesaun Fiskalizasaun Atividade Ekonomiku Sanitária no Alimentár(AIFAESA) atu kontrola presu foos iha Merkadu Covalima liuliu iha postu administrative Fatumea ne’ebé oras ne’e afeta hela COVID-19
“Husu ba Ministériu Koordenadór ba asuntu Ekonomiku (MKAE) no AIFAESA, hodi kontrola no intervene presu sasan baziku iha merkadu sira iha Munisípiu Covalima, ne’ebé oras ne’e komesa sa’e husu mós ba ministériu refere atu fasilita emprezarius lokál hodi halo restocking ba sasan baziku iha merkadu sira iha Munisípiu Covalima
husu ba Ministériu Asuntu Ekonomia atu tau konsiderasaun hodi responde ba Pedidu ne’ebé hato’o husi Autoridade Munisípiu Covalima, nune’e urjentemente CLN bele halo distribuisaun foos ba Komunidade sira iha fatin afetadu Covid-19 liuiu iha Postu Administrativu Fatumea”,dehan Portavoz, ESCVD-20, liuhusi komferénsia Imprensa iha Salaun RENETIL, Faról Dili, 27/02/2021.
Enkuantu ESCVD-20 ne’e rekomenda ba negosiante iha Covalima Labele aproveita hodi hasa’e folin sasan iha merkadu nomos ba kios sira ne’ebé mak lokaliza iha área afetadu COVID-19 sira iha Munisípiu Covalima
“Ami nia rekomendasaun komunidade vendedor/negosiante sira atu labele aproveita situasaun ida-ne’e hodi hasa’e folin sasan iha merkadu nomos ba kios sira ne’ebé mak lokaliza iha área afetadu COVID-19 sira iha Munisípiu Covalima no rekomenda mós ba parseiru dezenvolvimentu (NGO Nasionál no Internasional) sira, hodi hatudu jestu solidaridade ba ajuda komunidade iha Munisípiu Covalima, liu-liu área afetadu ba COVID-19 ,”tenik porta voz
Nia hatutan, Portavoz ne’e afirma, ejize mós ba Ministériu Interior atu fornese apoiu seguransa ba autoridade sira hodi halo kontrola maksimu ba movimentu ilegal sira iha área afetadu Covid-19, hodi nune’e reduz no hakotu poténsia transmisaun lokál (mitigasaun) ejize ba Governu atu Aumenta Rekursu Seguransa PNTL no F-FDTL iha Liña Fronteiras Munisípiu Covalima hodi haforsa postu vizilansia no halo observasaun másimu ba ema no sasan ne’ebé mak diskonfia kontra bandu tama no sai ilegalmente
Jornalista : Egidio Nono
Editor : Acacio Pinto
