Lafaeknews-Ekipa Servisu Covalima Vitoria ho Domin-20(ESCVD-20) Ejize Ministériu da Saúde liu husi Sentru Integradu Jestaun Krize(SIJK) atu imediatamente estabelese fatin kuarentena no izolamentu iha fatin afeta COVID-19 Postu administrativu Fatumea, Munisípiu Covalima atu asegura komunidade iha fatin refere
“ami hakarak hato’o ami nia ezijensia ba orgaun autoridade kompetente sira mak hanesan tuir mai:
1.ami ejize ba Ministériu Saúde atu imediatamente halo lalais transferénsia ba ema sira ne’ebé mak afetadu ona husi moras COVID-19 mai iha sentru izolamentu atu nune’e bele prevene no asegura komunidade Postu Administrativu Fatumea tomak, no emjeral Munisípiu Covalima;
2. ejize ba Ministériu Saúde atu hadi’a lalais jestaun serbisu Sentru Integradu Jestaun Krize (SIJK) Covid-19 nian, hodi estabelese urjentemente sentru karantina no sentru izolamentu iha Munisípiu Covalima, liu-liu iha Postu Administrativu Fatumea atu nune’e ekiapa Serbisu Saúde Munisípiu Covalima, bele iha kompeténsia propriu hodi ezerse sira nia funsaun ba halo atuasaun imediatu ba kazu sira ne’e mak mosu, nune’e la presiza tenki hein atuasaun husi serbisu saúde sentral Ministériu Saúde nian inkluí mós orienta ekipa serbisu Ministériu Saúde, atu distribui ekipamentu sira hanesan, maskra, no dezinfektan ba komunidade postu Administrativu Fatumeaan no Covalima emjera tau mós apoiu ambulánsia ida iha Postu Administrativu refere;
3.Ezije ba Ministériu Saúde atu halo lalais teste masal PCR no SWAB iha Covaliima,”dehan Porta Voz, Rosazio Dolorosos Ximenes, aba jornalista sira iha komferénsia imprensa, Salaun RENETIL, Faról, Dili, 27/02/2021.
Porta voz ESCVD-20, ne’e apela ba Komunidade Munisípiu Covalima, espesialmente ba sira ne’ebé mak hela iha área afetadu ba COVID-19 atu sira atu kontinua kumpri regras Estado Emerjenseia atu kontinua kumpri nafatin protokolu Ministériu Saúde no Organizasaun Mundiál ba Saúde nian, kona-ba prevensaun COVID-19. Hanesan aktu fase liman regularmente, mantein distansiamentu sosiál, uza maskra, hakamatek iha uma se laiha nesesidade importante ruma iha li’ur
“Tau fiar de’it ba Ekipa Serbisu Saúde no Ekipa Front Liner sira nia serbisu labele naran fiar ba kualker informasaun falsu ka hoax ne’ebé mak espalha iha públiku kumpri nafatin sirkular ne’ebé autoridade lokál hasai ona husu populasaun atu koopera didi’ak ho Autoridade Lokál sira, informa lalais ba Ekipa Serbisu Liña fronteira sira, wainhira iha informasaun ruma relasiona ho Covid-19,”tenik nia
Nia afirma tan, apela liu tan hahú agora ba oin, ESCVD-20, sei oferese-an nu’udar Ekipa serbisu integradu ida, hodi fo apoiu koordenasaun, no taktiku sira ba orgaun kompetente Governu nian, iha ámbitu prevensaun no mitigasaun atu nune’e bele reduz no satan moras Covid-19, labele iha transmisaun luan liu tan.
Jornalista :Egidio Nono
Editor : Acacio Pinto