Lafaek News—Provedoria Direitus Humanus no Justisa (PDHJ), ezije Komandante Jerál Polísia Nasionál Timor Leste (PNTL), Faustino da Costa, atu aplika medida kautelares nesesáriu ba membru polísia ne’ebé tiru mate ema na’in rua no hakanek ema ida iha aldeia Ainitas-Hun suku Lahane Osidental postu administrativu Nain-Feto munisípiu Dili.
“Husu ba Komandante Jerál PNTL atu loke prosesu disiplinár no aplika medidas kautelares nesesárias ba ajente refere hodi garante suspensaun ba nia ezersisiu ba funsaun sira to’o konkluzaun ba prosesu disiplinár, konforme artigu 70. husi dekretu-Lei 44 /2020, 7 Outubru kona-ba Regulamentu disiplinár PNTL,” Jesuina Maria Ferreira Gomes, Jornalista iha Edifisiu PDHJ Kaikoli, Segunda semana ne’e.
Tanba kazu ajente PNTL ho inisial MJ tiru sidadaun nain tolu hodi hamate ema nain rua no hakanek ema ida hanesan prátika krime omisidiu no integridade fízika grave no violasaun ba direitus umanus.
Tuir kódigu penal (KP) Timor-Leste no mos sujeita ba responsabilidade disiplinár konforme artigus 17. no 18. Rejime Jurídiku Uzu Forsa (RJUF) ne’ebé estabelese katak uzu forsa ne’ebé la hó loloos/individu mak sujeita ba responsabilidade kriminál no disiplinár.
Aliende ne’e, iha akontesimentu ne’e Ajente PNTL (MJ) la’os iha oráriu servisu nia laran, nia ba hatais kalsa badak ho kamizola singlet ida no sikat pistola iha nia kanotak ba buka vítima sira nia uma aldeia Ainitas-Hun, Suku Lahane Osidental, no uza armas hodi halo krime no viola sidadaun nia direitu ba moris no integridade fizika, hamate ema nain rua (aman no oan) no hakanek ema ida (manefoun husi vitima).
“Nune’e PDHJ rekomenda ba komandante jerál atu investiga no instaura prosesu disiplinár ba komandantes responsaveis másimu husi ajente PNTL (MJ) ne’ebé la halo kontrolu no máximu no efikaz ba iha ajente ne’e hodi lori armas ba nia uma fora husi oras servisu hodi la kumpre Normas ba uza armas iha PNTL hanesan despaixu n.º 290/CG-PNTL/IX/2016,” Deklara PDHJ.
Entretantu, liga ho kazu atentadu iha aldeia Ainitas-Hun suku Lahane Osidental, antes ne’e komandante jerál PNTL halo ona prosesu inísiu ba oknum PNTL Tiru Sidadaun Sivil nain rua mate no ida kanek todan.
“Ita hotu hein tempu badak sei remata sira nia prosesu tomak hodi intrega ba ministeriu publiku hafoin ministeriu publiku mak sei entrega ba tribunal depois juiz mak sei foti desizaun ba kazu ida ne’e,” dehan Komandante Operasional Pedro Belo Ba Jornalista liu husi Pres Komferénsia iha Komandu Jeral kaikoli dili, sabadu 06/06/2021.
Tanba ne’e, Polísia Nasionál Servisu Investigasaun Kriminal (PNSIK), halo ona prosesu inisiu no foti asaun prosedimentu kriminal ho disiplinar ba ho oknum PNTL ne’ebé tiru Sidadaun sivil nain rua mate no nain ida kanek todan.
Jornalista : Rita Moniz
Jornalista : Agapito de Deus
