Lafaek News—Provedoria Diretos Humanus no Justisa (PDHJ) halo monitorizsaun ba programa sesta bazika ne’ebé la’o iha territoriu laran maibé foin kobre munisípiu Lima (5), Dili, Baucau, Manufahi, Bobonaro no RAEOA, bainhira kompleta ona dadus sei submete ba Komisaun Anti Korupsaun (KAK) hodi halo investigasaun.
Diretór fiskalizasaun no rekomendasaun PDHJ, Bartolomeu Gonçalves, informa, ekipa PDHJ nia monitorizasaun iha terrenu komunidade barak kestiona kona-ba presu katak sasan folin $50, maibé kompania distribui ba komunidade presu la to’o.
“Ami nia ekipa halo monitorizasaun ba programa sesta bazika no detekta buat lubuk ida, hanesan komunidade balun kestiona tanba presu lato’o $50 dolar, hanesa iha RAEOA kompania balun manan projeitu maibé distirubui sasan to’o deit $38, ne’e lakoresponde ho saida maka governu hakarak, entaun ida ne’e sai problema bo’ot,” dehan Diretór Fiskalizasaun no Rekomendasaun PDHJ, Bartolomeu Gonçalves, iha salaun PDHJ, segunda, (07/06/2021).
Ho preokupasaun ne’e PDHJ konsidera indisius pratika abuzu de poder ba osan estadu nian liu husi distribuisaun sesta bazika, kategoria krimi nune’e sei enkamina ba KAK ba prosesu investigasaun.
“Ami sei halo apuramentu rekolla tan dadus para ami kompleta hodi enkamina ba iha Komisaun Anti Korupsaun (KAK) atu kontinua halo investigasaun no ba ministériu públiku,” hakotu Diretur.
Alende ne’e mós diretór relata, iha monitorizasaun ne’e PDHJ mós indentifika katak presiza atu hadia intermós de produtu ne’e, la’os produtu lokál, maibé ba produtu importadu sira husi rai liur.
Jornalista : Rita Moniz
Asisten Editór : Pedro de Almeida
