Lafaek News—Koordenadór Ekipa Emerjénsia Partidu Demokratiku (PD), Nino Pilipus Pereira, rekomenda governu atu normaliza lalais mota ne’ebé afeta direta komunidade no estabelese sentru saúde iha area Tasi-Tolu atu bele halo tratamentu komunidade besik liután.
Nino Pereira hatoo asuntu ne’e liu husi koneferénsia imprensa, tersa (13/04/21), iha sede Partidu Demokrátiku Kolmera, katak asaun karitativa hodi apoiu ba komunidade afetadu ba inundasaun iha 4/ abril, ne’ebé fó impaktu máka’as ba moris komunidade nian, sidadaun balu lakon nia vida no barak mak lakon uma inklui estragus sasán iha fatin-fatin liu-liu iha kapital Dili.
“PD nu’udar halo parte hosi Estadu de direitu demokrátiku, la tu’ur nonok, hodi hatudu ninia sentidu solidariedade ba inan-aman, maun-alin, bin-feton sira ne ‘ebé afetadu hosi kalamidade ne’e,” dehan Koordenadór ekipa emerjénsia solidariedade Demokráticu Nino Pereira.
Artista senior ne’e relata katak apoiu ne’ebé PD oferese maka foos sakas 431, inklui ai-moruk, ropa no lona hamtuk uma kain rihun ida atus ida ualu nulu resin ida iha munisípiu Dili, no Likisá ne’ebé hetan afetadu, no ekipa balu fornese bee moos ba iha Tasi-Tolu no Kolmera.
“Fornesimentu ai-han no be’e mós komunidade afetadu iha fatin barak mak lada’uk hetan apoiu, maibé ita hotu mós nafatin iha esperansa ba governu hodi bele responde imediata preokupasaun povu tomak nian,” dehan portavoz ne’e
Entretantu Partidu Demokratiku husi ekipa solidariedade hato’o mós rekomendasaun ba governu liu-liu parte releveante atu normaliza ona mota inklui tau sentru atendementu saúde ba iha area Tasi-Tolu.
“Ami rekomenda ba Governu fó atensaun imediatamente no normaliza mota ne ebe fó ameasa ba komunidade nia hela fatin hanesan, iha aldeia Lemorana (Dare), Tibar no fatin seluk tan, presija estabelese sentru atendimentu saúde iha area Tasi-Tolu hodi fó asistensia saúde ba komunidade afetadu sira,” nia hakotu.
Jornalista : Rita Moniz
Asisten Editór : Pedro de Almeida
