Lafaek News—Joven ho ferik-katuas labarik balu iha Kaikoli fó apoiu haforsa líder karimátiku Kay Rala Xanana Gusmão, hodi apoia familia matebian ezije foti mate isin Armindo Borges sai husi sala izolamentu Vera-Krús, maibe sirtuasaun jeral iha kapital Dili kontinua hakmatek.
Bento Alberto Carlos nu’udar portavoz informa, lider karizmátiku ninia prezensa iha sala izolamentu Vera-Kruz hamutuk ho populasaun sira ezije tenke foti mate isin Armindo Borges, tanba lakohi mate isin ne’e iha semitériu COVID-19 Metinaru.
“Ami nafatin husu parte relevante ne’ebé seidauk iha vontade di’ak atu deside la’o tuir familia nia hakarak liga ba deklarasaun ne’ebé la justu husi parte Sentru Integradu Jestaun Krize, tan ne’e ami mai atu ezije atu entrega hikas mate isin Armindo Borges ba familia Matebian,” dehan Bento iha nia deklarasaun durante hala’o manifestasaun iha Aldeia 04 kaikoli Dili, Tersa (13/04/2021).
Nia dehan, polítika governu oitavu governu konstitusional ba prevensaun COVID-19, lori fali terus ho susar ba sosiedade no populasaun hotu iha ámbitu serka sanitaria ne’e.
“Husi ami nia parte hamutuk ho avo Nana hodi hatete husi SIJK politiza sasan hodi estraga estabilidade iha ita nia rai laran partikularmente iha Dili Kapital nasaun,” Bento esplika.
Situasaun jerál iha Dili kontinua hakmatek transporte públiku kontinua movimentu, maski komunidade inklui juventude ho inan-aman no família matebian Armndo Borges kontinua haklalak no ezije governu liu husi SIJK no Ministériu Saúde tenke entrega mate isin ne’e ba familia maka haloot iha simitériu Manleuana.
Observasaun lafaek news, iha sala izolamentu vera-Krúz la’o hakmatek maski komunidade sira haklalak hodi apoiu prezensa Xanana Gusmão iha fatin refere, maibé autoridade seguransa husi unidade Marítima, Forsa Rezerva (task force) inklui BOP asegura situasaun kontinua kalma.
Iha okaziasaun ne’e, portavoz ba manifestasaun iha sala izolamentu Vera-Krúz, Bento afirma nia parte rekoñese dezde inisiu seidauk komete krime no kooperasaun di’ak tebes ho autoridade seguransa iha fatin ne’e.
“Dezde Horisehik too agora ami seidauk halo asaun krime tanba ne’e fo fatin mai ami atu koopera ho parte seguransa hodi ami tau hanoin hamutuk, ho liafuan “Defende ba lia loos, Ami la’os terorista ami hakarak ami nia nasaun hakmatek, ami lakohi moris ho COVID-19 Bosok,” relata portavoz ne’e.
Jornlista : Orlando Magno
Editor : Agapito de Deus
