Lafaek News–Kampañia dalimak iha Aileu, Eis komandante dahuluk Polísia Nasional Timor Leste, Paulo Fátima, hateten sorte Xanana Gusmão ho Ramo Horta sei iha, se la’e ema la konsidera no la tau estatua saudozu Franscisco Xavier do Amaral (Avo Xave) ho Nicolau Lobato iha Dili.
Aileu oan tenke hatene istória se laiha Xanana ho Ramos Horta estatuta ita nia saudozu Francisco Xavier do Amaral ho Nicolau Lobato, istoria luta hahú husi Aileu, Aileu oan tempu ona hili José Ramos Horta ba prezidente repúblika ne’ebé apoiu husi maun boot Kay Rala Xanana Gusmão,’’ Paulo Fátima hatoo asuntu ne’e iha nia intervensaun polítika iha kampañia dalimak iha kampu futeboll munisípiu Aileu, Domingo (06/03/22).
Paulo Fátima dehan, problema iha Timor nian ho nasaun viziñu Indonézia kona-ba baliza rai-maran, tasi no lalehan, ema husi nasaun seluk la koñese ema seluk só koñese de’it Xanana Gusmão ho José Ramos Horta maka reprezenta Timor Leste iha mundu internasional nia oin.
Iha sorin seluk, Sekretariu Estadu Asuntu Veteranus no Kombatenes Libertasaun Nasionál, Gil Oan Soru, husu veteranus ho antigus kombatentes Aileu oan sira labele fiar propaganda falsu husi ekipa susesu kandidatus balun katak subsídiu veteranu ba ho idozu sei lakon bainhira Prezidente Repúblika José Ramos Horta, labele fiar lia-fuan falsu hodi sobu Aileu oan nia unidade.
Labele fiar lia anin tun sa’e hodi bosok imi katak ami manan veteranus sira sei hetan osan boot, labele fiar, osan subsídiu ba veteranus sira ne’e hakerek nanis ona, iha konstituisaun labele bosok katuas ferik sira hodi hetan votus ikus mai ukun lori rezultadu terus ba povu tinan lima, labele fiar propaganda falsu hirak ne’e,’’ katak Oan Soru.
Oan Soru husu Raihusar oan sira atu hili José Ramos Horta ba Prezidente Repúblika periodu 20220-2027 no hili Kay Rala Xanana Gusmão ba Primeiru Ministru iha 2023 hodi servisu hamutuk hasai povu husi kiak no mukit ne’ebé povu territoriu nasional tomak infrenta dezde 2017 too ohin loron.
Oan esplika, Timor-Leste, oras ne’e, tama hela iha krize institusional ne’ebé provoka hosi aktus Presidente Republika hodi viola Konstituisaun, hahú hosi 2017, situasaun ne’e pratikamente paraliza tiha governasaun, ne’ebé fo impaktu boot ba iha vida moris povu no país nian, nune’e mak Partidu CNRT haré katak dalan úniku atu hakotu krize, maka liu husi eleisaun Presidensial ne’ebé sei hala’o iha 19 de Marsu 2022. Tanba ne’e, maka CNRT, iha Konferênsia Nasional 23 Janeiru 2022, deside hili kandidatu ida nebé iha kapasidade hodi, bain-hira eleitu, bele rezolve ka hakotu tiha krize ne’e, hodi nune’e labele lori tan impaktu negativu nebé boot ba iha Povu no Nasaun Timor-Leste, Nune’e konferensistas sira deside hili, José Manuel Ramos Horta núdar kandidatu P. CNRT hodi konko rre ka eleisaun presidensial ne’e, atu lori susesu ba iha eleisaun presidensial ne’e, presiza hamosu programa kampañia ida ne’ebé responde ba nesesidade povu no estadu nian, hodi nune’e bele hakotu krize no hadi’a hikas imajem Estadu nian, ne’ebé monu maka’as iha mundu internasional.
Jornalista : Abekha Raihusar
Editor : Agapito de Deus
