Lafaek News-Autoridade lokal suku Seloi Malere, Segunda, 20/05/2024, iha ne’ebé hamutuk ho estudante estajiadu husi universidade CRISTAL ho UNTL nomos komunidade suku Seloi Malere memoriza loron restaurasaun independensia Timor-Leste ba dala 22 liu husi atividade dada tali.
Autoridade lokal suku Seloi Malere, Antonio dos Santos Loco, relata loron 20 de Maiu loron ne’ebé importante tebes hanesan sidadaun Timor-oan, tenki hamriik hodi ko’alia nafatin ho fuan ho laran hodi memoriza duni loron importante ida ne’e.
“Ohin ita halo seremonia importante ida ne’e iha municipio hodi memoriza fila fali ba pasadu hodi hanoin ba futuru, la haluhan mós iha ita nia suku Seloi Malere, halo mós atividade ida ne’e, mesmu ita la halo atividade ida ne’ebé bo’ot, maibé ita halo atividade ki’ik sira ne’ebé mak bele tulun ita atu bele memorializa ita nia loron importante ida ohin, husi atividade ne’ebé ohin ita halo iha suku Seloi Malere, tulun mai husi ita nia komunidade, alin estudante estajiadu sira husi universidade CRISTAL ho UNTL nomós ita nia estrutura suku Seloi Malere”. Antonio relata.
Nia dehan, ohin iha ne’e, ita sei prepara atividade modalidade hitu (7) ne’ebé mak sei halo kompetisaun ba labarik ki’ik sira nomós ema bo’ot sira, alende ba ema bo’ot sira ita sei halo atividade rua hanesan sae bua nomós dada tali ba feto ho mane.
“Atividade ba labarik ki’ik sira mak sei tata sambua, halai taru karon, tata berlindus nomós hatama pregu ba botir, alende ne’e mós iha atividade adisional seluk ne’ebé mak ita sei halo hodi memorializa loron importante ida ne’e, husi atividade hirak ne’e, hetan apoiu masimu husi estudante estajiadu CRISTAL ho UNTL, tanba ne’e ita kompremetidu katak loron bo’ot importante sira hanesan ne’e nafatin kontinua halo ida ne’e, tanba loron importante sira hanesan ne’e, ita tenki hamutuk halo seremonia hodi unifika nafatin ita nia amizade hodi desenvolve ita suku no rai ida ne’e ba oin”. Autoridade lokal Seloma relata.
Sorin seluk administrador postu administrativu Aileu-vila, Abrão Nascimento da Costa haktuir katak, loron ida ohin hanesan loron importante ida ba ema Timor-oan hotu, hodi memoriza fila fali ba pasadu, tanba luta ne’ebé uluk ita nia heroi sira halo, ohin loron ita hotu goja ukun rasik-an, husi ukun rasik-an ne’e ita goza mai husi luta naruk ne’ebé ita nia heroi sira halo, tanba ne’e mak tinan-tinan sempre komemora loron importante sira ne’e hodi hanoin fila fali ba pasadu no hateke ba futuru ne’ebé sei mai.
“Tanba ne’e atan hau fó agradese ba komunidade nomós autoridade lokal ho estrutura tomak iha suku Seloi Malere, tau importansia duni ba loron importante sira ne’e, husi ita bo’ot sira nia kontribuisaun hodi realiza atividade hirak ne’e signifika katak ita bo’ot sira tau importansia loloos ba loron sira ne’e”. Abrão informa.
Entretantu presidente komisaun organizador ba atividade komemorasaun aniversariu Timor-Leste ba dala 22 iha suku Seloi Malere, Paulo de Araújo, dehan, relasiona ho loron restaurasaun independensia ba dala 22, iha municipio Aileu, liuliu suku Seloi Malere, ami servisu hamutuk ho autoridade lokal no estudante estajiadu husi universidade CRISTAL ho UNTL, halo kontribuisaun ho orsamentu hamutuk $2.8 dolar ne’ebé sufisiente hodi halo preparasaun ba atividade ne’ebé mak realiza ba loron importante ida ohin.
“Husi orsamentu ne’ebé iha ami fahe ba modalidade hitu (7) hanesan dada tali, tata berlindus, hatama pregu ba botir, halai karon, hasai osan husi jambua nomós sae bua, husi osan ne’ebé mai husi instituisaun rua hanesan CRISTAL ho UNTL, alende ne’e mós hetan apoiu husi autoridade lokal ho estrutura suku Seloi Malere nian”. Nia hakotu.
Tuir observasaun jornalista Lafaek News iha terenu nota katak, partisipasaun ba atividade loron importante ida ohin iha suku Seloi Malere mai husi administrador postu administrativu Aileu-vila, komanante eskuarda Aileu-vila, diretor nasional lujistika ministerium saúde, diretor saúde municipio Aileu, diretor sefope Aileu, diretor agrikultura, segundu komanante bombeirus, komanante justisa munisipiu Aileu nomós entidade relevantes balun husi municipio Aileu.
Jornalista : Crispin de J. Amaral
Editor : Agapito de Deus
